Son illərdə bir çoxları artıq çəkidən qurtulmaq üçün axşam yeməyi yemirlər. Normal çəkidə qalmaq üçün saat 18-dən, 19-dan və ya 20.00-dan sonra qida qəbul etməyənlər çoxdur.
Bu, bir çox hallarda mütəxəssislərin, dietoloqların tövsiyəsi ilə baş verir. Amma bunun əksini düşünənlər də var.
Yapon alimləri hesab edirlər ki, axşam yeməyindən qaçmaq gələcəkdə çəkinin artmasına səbəb ola bilər. “The New York Post” xəbər verir ki, mütəxəssislər 3 il ərzində 17573 kişi və 8860 qadın müşahidə ediblər. Axşam yeməyini ötürən iştirakçıların artıq kütlə yığdıqları məlum olub.
Alimlər kişilərin 10,8 faizi, qadınların isə 17,1 faizinin axşam yeməyi yemədiklərini təxmin edirlər. Kilo artımının digər ümumi səbəbləri arasında yaş, yuxu çatışmazlığı, həddindən artıq alkoqol qəbulu və siqaret çəkmək var.
Tədqiqatçılar, axşam yeməyindən çəkinməyin, güclü aclıqdan qaynaqlanan nizamsız bir iştaha səbəb olduğunu deyirlər. Yəni insan yemək miqdarına nəzarət edə bilmir.
Bu nəzəriyyə hələ 100 faiz sübut edilməyib, lakin alimlər bu nəticənin piylənmənin qarşısını almaq üçün istifadə edilə biləcəyini qeyd edirlər.
