“Azərbaycan ilə Türkiyə arasında əlaqələrin böyük tarixi var. Ortaq kök, dil, din birliyi, oxşar mədəniyyət, adət və ənənələr. Ən əsas amil isə ən çətin anlarda bir-birinin yanında olmaq. Bunu Türkiyə Prezidenti Rəcəb Tayyib Ərdoğan Milli Məclisdə çıxışı zamanı bir daha təsdiqlədi”.
Bu fikirləri “İki sahil”ə açıqlamasında Milli Məclisin deputatı Ceyhun Məmmədov deyib.
C. Məmmədov bildirib ki, Rəcəb Tayyib Ərdoğan Azərbaycan ilə Türkiyənin dost və qardaşlığını Milli Məclisdən bir daha dünyaya nümayiş etdirdi: “Ərdoğan çıxışında regionun inkişafı üçün görüləcək işlərdən bəhs edərkən Ermənitanın bu prosesdə sülhə, təhlükəsizliyə mane olmaması məsələsinə xüsusi toxundu. Eləcə də, bölgədə altılıq formatda bir əməkdaşlığın formalaşdırılması ilə bağlı da öz fikirlərini bildirdi. Türkiyə Prezidenti Şuşaya səfəri zamanı Füzulidən keçərkən gördüyü erməni vandalizmi baradə də xüsusi danışdı. Ərdoğan bildirdi ki, biz oraları yenidən inşa edərək, yeni bir Qarabağ ərsəyə gətirəcəyik”.
Deputat qeyd edib ki, göründüyü kimi, Türkiyə ilə Azərbaycan arasındakı əlaqələr çoxşaxəlidir və bütün sahələri əhatə edir: “Ərdoğanın çıxışı bir daha sübut etdi ki, Türkiyə ilə Azərbaycan hər sahədə çiyin-çiyinədir. Azərbaycan-Türkiyə qardaşlığı və əməkdaşlığının bütün sahələr üzrə davamlı inkişaf etdirilməsinə nail olan Azərbaycan Respublikasının Prezidenti İlham Əliyevlə Türkiyə Resublikasının Prezidenti Rəcəb Tayyib Ərdoğanın dövlətlərarası səviyyədə olduğu kimi, şəxsi münasibətlərdə də əsl qardaşlıq nümayiş etdirmələri olduqca dəyərlidir”.
