Məşhur akademiyanın yeganə qızıl medalçısı, şəhid Babək Ramaldanov – VİDEO
Vətən müharibəsi şəhidi polkovnik-leytenant Babək Ramaldanov 1982-ci il avqustun 9-da Bakı şəhərində anadan olub.
O, Cəmşid Naxçıvanski adına Hərbi Liseydə, sonra isə Heydər Əliyev adına Ali Hərbi Məktəbdə təhsil alıb.
2004-cü ildən Azərbaycan ordusunun sıralarında xidmətə başlayan Babək Ramaldanov üçün vətənin müdafiəsi hər şeydən vacib, işğal altında olan torpaqlarımızı azad görmək arzusu isə hər bir arzudan öndə olub. Bu amalına çatmaq üçün gecə-gündüz öz üzərində çalışıb.
Polkovnik-leytenant 2019-cu il iyunun 21-də Moskvada Rusiya Federasiyası Silahlı Qüvvələri Ümumqoşun Akademiyasını fərqlənmə ilə bitirərək, magistr diplomu və qızıl medal alıb.
Ramaldanov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində şəxsi heyəti ilə birlikdə 10 gün Murov dağı ətrafında, sonra isə Füzuli, Cəbrayıl istiqamətində əməliyyatlarda iştirak edib.
Oktyabın 16-da döyüş tapşırığını yerinə yetirərkən qəhrəməncasına həlak olaraq, müqəddəs şəhidlik zirvəsinə ucalıb.
Babək Ramaldanov Azərbaycanın ərazi bütövlüyünün bərpa edilməsi zamanı vəzifə borcunu ləyaqətlə və vicdanla yerinə yetirdiyinə görə ölümündən sonra Prezident İlham Əliyevin sərəncamlarına əsasən, “Azərbaycan bayrağı” ordeni, “Vətən uğrunda” və “Cəbrayılın azad olunmasına görə” medalları ilə təltif edilib.
