Azərbaycanda Qadın Sahibkarlığının İnkişafı Assosiasiyasının (AQSİA) Avrasiya Araşdırmalar Mərkəzinin birgə təşkilatçılığı ilə şəhid və qazi ailələrinə dəstək məqsədli silsilə regional səfərlər çərçivəsində oktyabr 1-də Azərbaycan Respublikasının Tərtər rayonunun Suqovuşan kəndinə səfər təşkil olunub.
AQSİA-dan “İki sahil”ə bildirilib ki, səfər zamanı Tərtər Rayon İcra Hakimiyyətinin başçısı Müstəqim Məmmədov, Milli Məclisin deputatı Qənirə Paşayeva, AQSİA-nın İdarə Heyətinin sədri Səkinə Babayeva, Tərxis Olunmuş Hərbçilərin Gəncləri Maarifləndirmə İctimai Birliyinin sədri, hərbi ekspert Emin Həsənli, AQSİA-nın işçi heyəti, AQSİA İdarə Heyətinin üzvü Vəsilə Abulova, Taylors Home brendinin sahibi Aynur Abbasova və sairə şəxslər iştirak edib.
Ötən il oktyabrın 3-də azad olunan və tarixi adı bərpa edilən Suqovuşana səfər zamanı Müzəffər Ali Baş Komandan İlham Əliyevin uğurlu siyasəti və igidlərimizin əbədi qəhrəmanlığı haqqında fikirlər səsləndirilib.
Görüşdə yerli əhali də iştirak edib və onlarla danışıqlar aparılıb. AQSİA İdarə Heyətinin sədri Səkinə Babayeva Suqovuşanın işğaldan azad olunmasından 1 il ötdüyünü və bu hisləri bizə yaşadan şəhidlərimizə Allahdan rəhmət, ailələrinə səbir, qazilərimizə cansağlığı, əsgərlərimizə uzun ömür arzu etdiyini qeyd edib.
