Əlillik təyinatı aparılan şəxslərin sayı AÇIQLANDI
“Hazırkı dövrə qədər 47 mindən çox şəxsə əlillik təyinatı aparılıb”.
ARANTV.AZ-ın məlumatına görə, bunu Əmək və Əhalinin Sosial Müdafiəsi Nazirliyi yanında Dövlət Tibbi-Sosial Ekspertiza və Reabilitasiya Agentliyinin Tibbi-Sosial Ekspertiza xidmətinin təşkili departamentinin müdir müavini İlkin Yusifov deyib.
Onun sözlərinə görə, həmin şəxslərdən 15 minə yaxınına ilkin əlillik təyinatı aparılıb:
“33 minə yaxın şəxsə isə təkrar əlillik təyinatı aparılıb. Təkrar müraciət edənlərin əksəriyyəti 2015-ci ildə tibbi sosial ekspert komissiyasında müayinə olunanlardır. Həmin vaxt komissiyanın qərarı elan ediləndə əlilliyin bir illik təyin olunduğu bildirilib.
Sonradan Nazirlər Kabinetinin qərarına əsasən əlillik 5 il müddətinə uzadılmışdı. 5 il müddətində əlilliyi olan şəxslər mütəmadi olaraq müalicə və müayinə olunmalı idi”.
“Əlilliyin dayandırılması və əlillik müddətinin bitməsinə görə müavinətin kəsilməsi fərqli-fərqli məsələlərdir. Müddətin bitməsinə görə şəxs yenidən əlillik təyinatı üçün müraciət edə bilər. Tibbi göstəriş olarsa, o zaman əlillik təyinatı bərpa edilir”, – deyə o qeyd edib.
