2020-ci il pandemiya reallığı fonunda dünya çapında qlobal, bəşəri təhlükə ilə yadda qaldı. Üç araşdırmamızda məhz pandemiyanın müxtəlif istiqamətlərdə vurduğu ziyanların, əhalinin gəlirlərinin azalmasını, iş yerlərinin itirilməsini və sair problemləri təqib etmişik. Eləcə də dövlət və idarəetmə aspektlərinin müxtəlif sahələri, o cümlədən bələdiyyə institutlarının fəaliyyəti ilə bağlı məsələlər gündəmdə saxlanılıb. Bir tədqiqatımız isə ahıl insanlarla bağlı idi. Bizim bütün tədqiqatlarımız dövlət, hökumət orqanlarına təqdim edilib.
Bu fikirləri AZƏRTAC-a müsahibəsində Sosial Tədqiqatlar Mərkəzinin İdarə Heyətinin sədri, Milli Məclisin deputatı Zahid Oruc bildirib.
Mərkəzin üçillik planı, o cümlədən 2020-ci ilin əsas mövzuları haqqında danışan İdarə Heyətinin sədri deyib: “2020-ci il Azərbaycanın siyasi yox, mənəvi təqviminin, milli həyatının ayrılmaz hissəsi olan Vətən müharibəsi ilə əlamətdar oldu. Biz savaşın getdiyi ağır günlərdə həm dövlətimizin başçısının atdığı addımların cəmiyyət tərəfindən böyük rəğbətlə qarşılanması, eləcə də Böyük Qayıdışın başlanması ilə əlaqədar işləri tədqiq etməyə çalışdıq. Bizim bununla bağlı 25-dən çox tədqiqatımız ictimaiyyətə təqdim olunub və mərkəzimizin saytında yerləşdirilib. Çox istərdik ki, ölkəmizdə tədqiqat işinə maraq artsın. Məsələn, tədqiqat könüllülərinin yaranması və onlarla iş bu istiqamətdə səmərəli ola bilər”.
O vurğulayıb ki, bu gün başlıca məqsəd ölkə həyatı qarşısında dayanan problemləri, çağırışları, vəzifələri düzgün müəyyənləşdirərək rəhbərliyə təqdim etməkdir. Bu istiqamətdə Prezident İlham Əliyevin mövqeyi ondan ibarətdir ki, ictimai fikir hər zaman öyrənilməlidir. Biz də cəmiyyətdə gedən tendensiyaları obyektiv şəkildə dəyərləndirməliyik. Həmçinin ən başlıca məqsədimiz o olmalıdır ki, dövlətin atdığı addımlar cəmiyyətin mənafeyinə, marağına necə təsir etdiyini insanlar özləri qiymətləndirsinlər və ya ictimai fikir dövlətə çatsın. Həmçinin burada olan əngəllər aradan qalxsın. Eyni zamanda, vətəndaşların fikri eşidilsin. Mərkəzimizin yaradılmasının başlıca məqsədi də budur.
