İşğaldan azad edilən torpaqlarımızda bayram tonqallarının alovlanması düşmənə göz dağıdır
«Gün gələcək Novruz bayramını Şuşada keçirəcəyik, o biri il Laçında, o biri il Kəlbəcərdə, o biri il Ağdamda, Füzulidə, Zəngilanda, Qubadlıda… işğal altında olan bütün torpaqlarımızda keçirəcəyik.» Bu tarixi sözləri ulu öndər Heydər Əliyevin illər öncə Novruz bayramı münasibətilə məcburi köçkünlərlə keçirdiyi görüşlərdən birində səsləndirmişdir. Bu, təkcə arzu deyildi, həm də Ulu Öndərin xalqa verdiyi söz, inandığı gerçəklik idi. Düzdür, ömür vəfa etməsə də, illər sonra onun bu arzusunu layiqli siyasi varisi Prezident İlham Əliyev yerinə yetirdi. Cənab İlham Əliyev ilk dəfə Prezident seçildiyi 2003-cü ildən bu yana bu istiqamətdə böyük işlər həyata keçirdi. Zaman və tarix göstərdi ki, cənab Prezident vədinə və özünün də dediyi kimi, ata vəsiyyətinə sona qədər sadiq qalaraq ərazi bütövlüyümüzün bərpasında prinsipial mövqe və qətiyyət sərgiləyən liderdir.
Bu qətiyyətliliyin ən bariz nümunəsi artıq iki ildir ki, Novruz tonqallarının işğaldan azad edilmiş torpaqlarımızda qalanmasıdır. Prezident İlham Əliyev və birinci xanım Mehriban Əliyevanın keçən il Şuşanın məşhur Cıdır düzündə, bu il isə Tərtərin Suqovuşan qəsəbəsində bayram tonqalını alovlandırmaları Azərbaycan xalqının Novruz bayramını Zəfər təntənəsi ilə qeyd etdiyinin təcəssümüdür. Qeyd edək ki, Prezident İlham Əliyev və birinci xanım Mehriban Əliyevanın Suqovuşan qəsəbəsinə səfəri özünün proqram zənginliyi ilə yadda qalıb. Bu qəsəbə Vətən müharibəsinin ilk günlərində rəşadətli Azərbaycan Ordusu tərəfindən azad edilən ərazilərdəndir. Hərbi əməliyyatlar başa çatdıqdan dərhal sonra bərpa-quruculuq işləri də məhz buradan başlanılıb. Qəsəbədə müasir izolyasiyalı və mühafizəli kabel xəttinin açılışı, yeni məscid və turizm kompleksinin təməlinin qoyulması, «N» saylı hərbi hissə və avarçəkmə təlim-məşq toplantısının rəsmi açılışı bir daha göstərdi ki, bütün bunlar Suqovuşana, ümumilikdə isə Qarabağa həyatın yenidən qayıtmasının başlanğıcıdır.
Dövlətimizin başçısı Azərbaycan xalqına Novruz bayramı münasibəti ilə təbrikində mühüm tarixi faktlara toxunub. Otuz ilədək davam edən erməni təcavüzündən və xalqımızın bu işğala qarşı barışmaz mövqedə olduğundan danışan Prezident İlham Əliyev abadlıq-quruculuq işlərinin sürətlə həyata keçirilməsini və keçmiş məcburi köçkünlərin tezliklə öz doğma diyarlarına qayıtmalarının qarşıda dayanan əsas vəzifələrdən olduğunu vurğulayıb.
Vətən müharibəsində parlaq Zəfərin qazanılmasında gənclərin roluna diqqət çəkən Prezident xalqımızın Qarabağ və Şərqi Zəngəzurda sülh, əmin-amanlıq, təhlükəsizlik şəraitində yaşayacağını qətiyyətlə bildirib. Bu mesajlar bir daha təsdiq edir ki, regionda sülh və təhlükəsizliyin qarantı Azərbaycan dövləti, rəşadətli ordumuz və Müzəffər Ali Baş Komandanımız İlham Əliyevdir. Qarabağdan Azərbaycan xalqına Novruz təbriklərini çatdırmağı özü üçün xoşbəxtlik hesab edən Prezidentimizin, həmçinin Azərbaycanın daim yüksələn xətlə və sürətlə inkişaf etməsi üçün var gücü ilə çalışacağını bəyan etməsi həm də düşmənlərə dəmir yumruğun qüvvədə olmasının xatırladılmasıdır.
Bu gün ölkəmiz güclü iqtisadiyyata malikdir və bu, özünü işğaldan azad edilmiş torpaqlarımızdakı gedən tikinti-quruculuq işlərinin genişliyində də göstərir. Hazırda Prezident İlham Əliyevin sarsılmaz siyasi iradəsi sayəsində Suqovuşan da daxil olmaqla işğaldan azad edilmiş hər bir yaşayış məntəqəmiz sürətlə bərpa olunur, bu ərazilərdə yaşamaq və işləmək üçün lazım olan bütün infrastruktur yaradılır. Dövlətimizin başçısının dediyi kimi, Azərbaycan xalqı öz əzəli torpaqlarına əbədi olaraq qayıdıb. Abadlıq-quruculuq işlərinin sürətlə həyata keçirilməsini şərtləndirən əsas amillərdən biri isə xalqımızın milli həmrəyliyi və sarsılmaz xalq-iqtidar birliyidir.
