Mənə ordu gərəkdir sarsılmaz cahan kimi
Azərbaycan Respublikasının Prezidenti, Müzəffər Ali Baş Komandan İlham Əliyevin sədrliyi ilə 12 aprel 2022-ci il tarixdə cari ilin birinci rübünün yekunlarına həsr edilmiş müşavirə keçirildi. Ölkə başçımız müşavirə zamanı ilin birinci rübündə görülmüş işləri təhlil etmiş və digər rüblərdə görüləcək işlərdən bəhs etmişdir.
2022-ci ilin birinci rübünün yekunlarına həsr edilmiş müşavirədə Müzəffər Ali Baş Komandanımızın vurğuladığı məsələlərdən biri ordu qurulucuğu ilə bağlı idi. Bildiyimiz kimi 44 günlük Vətən müharibəsi ölkə başçımızın siyasəti və şanlı Azərbaycan ordusunun gücü hesabına qələbə ilə yekunlaşdı. II Qarabağ müharibəsinin gedişatı və nəticəsi hər kəsə sübüt etdi ki, Azərbaycan ordusu həm maddi –texniki təchizat baxımından, həm də şəxsi heyət baxımından olduqca güclüdür. Bunun əsas səbəbi isə Cənab Prezidentimizin ordu qurulucuğu sahəsinə hər zaman diqqətlə yanaşmasıdır. Müşavirə zamanı Prezident İlham Əliyev qeyd etdi ki, biz bundan sonra da ordu quruculuğuna nə qədər vəsait lazımdırsa o qədər də ayıracağıq.Ölkə başçımız qeyd etdi ki, müharibədən sonra Müdafiə Nazirliyində sturuktur islahatları aparılmış, dəyişikliklər edilmişdir. Bu addım ordumuzu daha da gücləndirəcək daha da müasirləşdirəcəkdir. Müşavirə zamanı cənab Prezident Azərbaycan Ordusunun yeni qoşun növü olan Komandodan da bəhs etdi. O qeyd etdi ki, işğaldan azad edilmiş Hadrut qəsəbəsində birinci hərbi bazanın açılışında özü şəxsən iştirak etmişdir. Müzəffər Ali Baş Komandanın nitqindən aydın oldu ki, yeni yaradılmış bu qoşun növü çox güclü və hazırlıqlıdır. İstənilən vəzifənin öhdəsindən gəlməyə qadirdir. Komando şəxsi heyyətinin say tərkibini tamami ilə açıqlamağı lüzum bilməyən Cənab Ali Baş Komandan qeyd etdi ki, hər kəs bilməlidir ki, minlərlə tam hazırlıqlı döyüşçü artıq hazırlanıb və hazırlanacaqdır . Komandoların sayı ildən ilə artacaqdır.
Bildiyimiz kimi Azərbaycan Ordusunun ən güclü bölmələrindən biri Xüsusi Təyinatlı Qüvvələrdir. 44 günlük Vətən Müharibəsi dövründə bu qüvvələr xüsusi rəşadət göstərmişdir. Məhz 7 Noyabr 2020-ci il tarixində Azərbaycan Ordusunun Xüsusi Təyinatlı qüvvələri Şuşa şəhərinin qayalıqlarını dırmanaraq yüngül silah- sursat ilə Şuşaya daxil olmuşdur. Onlar tezliklə erməni qoşunlarını şəhərdən çıxarmış və 8 Noyabr 2020-ci il tarixində Prezident İlham Əliyev Şuşanın işğaldan azad edilməsini bəyan etmişdir. 12 noyabr müşavirəsində ölkə başçımız Xüsusi Təyinatlı Qüvvələrdən bəhs edərək qeyd etdi ki, İkinci Qarabağ Müharibəsində böyük qəhrəmanlıq göstərmiş bu qüvvələrin sayı artırılmış və artırılacaqdır. Sonda bir haşiyə çıxaraq qeyd etmək istərdim ki, Azərbaycan silahlı qüvvələrinin yaranması 1918-ci ilə təsadüf etsə də, onun güclənməsi, nizama salınması birmənalı şəkildə ulu öndər Heydər Əliyevin adı ilə bağlıdır. Ulu öndər Heydər Əliyev hakimiyyəti dövründə həm Prezident, həm də Ali Baş Komandan olaraq, ordunun qüdrətli olmasına diqqəti yönəltdi. Ulu öndər Heydər Əliyev mövcud olan bütün silahlı birləşmələri vahid komandanlıq altında birləşdirdi.
Ulu Öndərimizin siyasi kursunun layiqli davamçısı olan ölkə başçımız qalib sərkərdə Cənab İlham Əliyev, vəzifəsini icra etdiyi ilk gündən qeyd edir ki, mənim fəaliyyətimin əsas istiqamətlərindən biri də, ordunu gücləndirməkdən, onun maddi-texniki bazasını möhkəmləndirməkdən ibarətdir. Biz 44 Günlük Vətən müharibəsi zamanı onun bu sahədə necə uzaqgörən siyasət icra etdiyinin bir daha şahidi olduq. Cənab prezidentin ordunu hazır vəziyyətə gətirməsi nəticəsində “Dəmir Yumruq” əməliyyatı ilə özünün də, söylədiyi kimi “biz həm döyüş meydanında, həm informasiya məkanında, həm də siyasi müstəvidə qələbə qazandıq. Döyüş meydanında düşmənin belini qırdıq və bildirdik ki, Qarabağ Azərbaycandır!” Müşavirə zamanı bir daha aydın oldu ki, cənab prezident hər zaman ordu quruculuğu böyük önəm verir və bu məsələyə diqqətlə yanaşır.
Məqaləmin sonunda Vətən məfhumunu bu qədər dərindən hiss etməyimizdə, qürurla və fəxarət hissi ilə fikirlərimizi ifadə etməkdə vasitəçi olan Müzəffər Ali Baş Komandan cənab İlham Əliyev başda olmaqla şanlı ordumuzun cəsur döyüşçülərinə sonsuz kərə minnət duyduğumu ifadə etmək istəyirəm.
Yaşasın Müzəffər Ali Baş Komandan. Yaşasın Şanlı Azərbaycan Ordusu. Arzu edirəm ki, Vətənin keşiyində duran hər bir əsgər və zabitin hər zaman nişanları kəskin, qolları qüvvətli, canları sağlam olsun!
Fəridə Süleymanova,
Tərtər rayon Heydər Əliyev Mərkəzinin elmi işçisi
