Şuşadan Zəngəzura gedən yol…
22 Aprel tarixində Şuşa şəhərində Dünya Azərbaycanlılarının V Qurultayı – Zəfər Qurultayı keçirildi. Zəfər Qurultayının Şuşada keçirilməsi tariximizin ən önəmli hadisələrindən bir idi. Bir neçə il bundan öncəyə qədər işğal həsrəti çəkən Şuşamız şükrlər olsun ki, bu gün dünyanın dörd bir tərəfindən ona pənah gətirmiş öz doğma sakinlərinə qucaq açdı. Mədəniyyət paytaxtımız olan Şuşa Zəfər paytaxtımıza çevrildi.
Zəfər Qurultayında çıxış edən Cənab Prezident İlham Əliyev 44 günlük Vətən müharibəmizin xalqımızın birliyi hesabına qazanıldığını bir daha bütün dünyanın diqqətinə çatdırdı. Cənab Prezident çıxışında tarixi həqiqətlərdən bəhs etdi, Münhen Təhlükəsizlik Konfransında olduğu kimi yenə də, ermənilərə tarix dərsi keçdi. Azərbaycanla heç bir dövlətin hədə qorxu dilində danışa bilməyəcəyini bir daha bəyan etdi. Azərbaycan regionda aparıcı qüvvədir və bu regionda istənilən bir məsələ artıq Azərbaycanla mütləq razılaşdırılmalıdır.
Təxminən 30 il davam edən işğal dövründə beynəlxalq təşkilatların məsələnin həlli yolunda hansısa bir əməli addım atmadığı bir daha vurğulandı. Azərbaycan öz hərbi qüdrəti hesabına tarixi və beynəlxalq hüququ ədaləti bərpa etdi. Eyni zamanda Cənab Prezident İlham Əliyevin münasibətlərin normallaşması üçün Ermənistanın artıq sonucu şansı olduğunu bir daha diqqətə çatdırdı. İşğal ərzində tarixi torpaqlarımızda ermənilərin törətdikləri vandalizm göz önündədir. Bütün bunlara baxmayaraq regionun sülhü naminə və bölgəmizin inkişafı naminə Azərbayacan Ermənistana sülh şansı yenə təklif edir. Bu gün işğaldan azad olunmuş ərazilərimizdə böyük quruculuq işləri gedir və tezliklə bütün yurd yerindən ayrı düşmüş vətəndaşlarımız öz torpaqlarına qayıdacaqlar.
Qurultayda tarixi həqiqətləri, eyni zamanda nadir mədəniyyət nümunələrimizin dünya ictimaiyyətinə çatdırılmasında diasporamızın rolu xüsusi olaraq qeyd edildi. Bundan sonra da, diasporamızın informasiya müharibəsində aktiv olacağına hər kəsin inamı tamdır. Ümumilkdə Şuşa Qurultayı hər bir Azərbaycanlıda böyük qürur və fərəh hissi oyatdı. Şuşa Azərbayacandır! Qarabağ Azərbaycandır!
Elçin Cəfərli- YAP Bərdə rayon təşkilatının təbliğat qrupunun üzvü, Bərdə rayon Şəhid A. Tağıyev adına Məmmədli kənd tam orta məktəbin direktoru.
