“Süd vəzində rast gəlinən xəstəliklər arasında yeni törəmələr üstünlük təşkil edir. Bundan başqa, süd vəzində ilthabi xəstəliklər də daha çox rast gəlinən problemdir. Törəmələr özü də iki növə ayrılır xoşxassəli süd vəzi törəmələri və bədxassəli süd vəzi xərçəngi. Təəssüf ki, Azərbaycan da daxil olmaqla, bütün dünyada süd vəzi xərçəngi gəncləşib”.
Bunu Medical Media-ya açıqlamasında onkoloq-mammoloq Rəna Niftəliyeva deyib.
Mütəxəssis bildirib ki, əvvəllər xərçəngin bu növünə daha çox orta və yaşlı şəxslərdə rast gəlinirdi. Amma indi vəziyyət sürətlə dəyişir. Bunun müxtəlif səbəbləri var. Ən əsas səbəbləri isə qadınların həyat tərzinin dəyişməsidir. Əvvəlki illərlə müqayisədə qadınlar indi daha az sayda uşaq dünyaya gətirir, daha az uşaq əmizdirir. Bundan başqa, qadınların iş həyatında daha aktiv çalışmaları da xəstəliyin çoxalmasına gətirib çıxarır. Çünki iş şəraitində qadınlar daha çox stress, əsəb, gərginlik keçirirlər. Bu da xərçəngin yaranmasında ən böyük faktorlardan hesab edilir.
