Hayların səpdikləri “toxumlar” heç zaman cücərməyəcək
Fransa, İran kimi havadarlarına güvənən təcavüzkar Hayastan Azərbaycanın Qarabağ iqtisadi rayonunda gərginliyi artırmaqdadır. Özü də onlar son günlər törətdikləri təxribatları kənd təsərrüfatı işləri adı altında həyata keçirməyə cəhd edirlər. Konkret faktlara müraciət edək. Martın 25-də Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri Füzuli rayonunun Yuxarı Veysəlli yaşayış məntəqəsi istiqamətində kənd təsərrüfatı işləri adı altında səngərin mühəndis cəhətdən hazırlanması məqsədilə qazıntılar aparmağa cəhd göstəriblər. Bölmələrimiz tərəfindən görülən təxirəsalınmaz tədbirlər nəticəsində aparılan işlər dərhal dayandırılıb. Erməni mətbuatı martın 27-də Ağdərədəki nar bağında, aprelin 1-də isə Xocalı rayonunun Naxçıvanlı kəndi ərazisində kənd təsərrüfatı işləri ilə məşğul olan işcilərə guya ordumuzun atıcı silahlardan atəş açması barədə məlumatlar da tirajlayıb.
Amma reallıq ondan ibarətdir ki, erməni quldurları Rusiya sülməramlılarının müvəqqəti məskunlaşdıqları ərazilərdə bu ad altında növbəti təxribatlara hazırlıq görürlər. Özü də onlar bu kimi işlərdə yerli sakinlərdən, yəni mülki şəxslərdən istifadə edirlər. Bu isə separatçıların Qarabağ ermənilərini öz girovlarına çevirməsindən xəbər verir. Başqa sözlə desək, Qarabağ regionundakı quldur dəstələri öz çürük niyyətlərini reallaşdırmaq üçün onları qurbanlıq seçiblər. Təəssüf ki, Azərbaycan vətəndaşlığını qəbul etməkdə hələ də tərəddüd edən yerli əhali bu adi həqiqəti başa düşmür. Hətta Azərbaycan Ordusunun potensial təxribatların törədilməsinin qarşısının alınması məqsədilə Xankəndi-Xəlfəli-Turşsu istiqamətində torpaq yol adlanan ərazidə uğurlu əməliyyat apararaq bəzi strateji və taktik məntəqələrə, həmçinin yola zəruri nəzarət tədbirləri həyata keçirməsi də onları ayıltmayıb.
Şübhəsiz, erməni separatçılarının kənd təsərrüfatı işləri adı altında fəaliyyətləri beynəlxalq ictimaiyyətin gözünə kül üfürməkdən, başqa bir şey deyil. Bunu həm də onların hər zaman olduğu kimi, “Amandı, qoymayın, azərbaycanlılar bizi heç kənd təsərrüfatı işləri ilə də məşğul olmağa imkan vermirlər” bağırtıları ilə növbəti şou yaratmaq cəhdi kimi də dəyərləndirmək olar. Artıq dünyanın əksər dövlətləri, həmçinin beynəlxalq qurumlar onların bu yalanlarına, iftiralarına, “diplomatik hay-küy”lərinə inanmır. Ona görə də son günlər Hayastan və Qarabağdakı separatçı rejim digər dövlət və qurumlardan dəstək ala bilmir. Şübhəsiz, bu prosesdə Prezident İlham Əliyevin diplomatik gedişləri, qətiyyətli və cəsarətli siyasəti də önəmli roy oynayır. Məhz dövlət başçımızın qətiyyəti sayəsində artıq dünya gücləri rəsmi Bakının “Qarabağ Azərbaycanın daxili işidir” prinsipial mövqeyini qəbul ediblər.
Hayastanın bu kimi addımları bir daha göstərir ki, işğalçı dövlət Azərbaycana qarşı ərazi iddialarından hələ də əl çəkməyib. Prezident İlham Əliyevin Novruz bayramı münasibətilə Azərbaycan xalqına müraciətində bildirdiyi kimi, bu gün İkinci Qarabağ müharibəsinin ibrət dərsi Ermənistana hələ ki, dərs olmayıb. Çünki biz görürük ki, Ermənistanda revanşist qüvvələr baş qaldırıb. Ermənistanda yenə də Azərbaycana qarşı, Azərbaycan torpaqlarına qarşı ərazi iddiaları qaldırılır.
Sülh sazişi üzrə beynəlxalq səylərin canlanması dönəmində 10 noyabr 2020-ci il tarixli üçtərəfli Bəyanata zidd addımlar atan Hayastan bu prosesi məqsədyönlü şəkildə pozmaqda, bölgədə sabitliyin təmin edilməməsində çox maraqlıdır. Elə bu niyyətlə də rəsmi İrəvan revanşist qüvvələrə dəstək verməkdə davam edir.
Yeri gəlmişkən qeyd edək ki, aprelin 1-də keçirilən xidməti müşavirədə müdafiə naziri, general-polkovnik Zakir Həsənov Azərbaycan-Ermənistan şərti dövlət sərhədində və Qarabağ iqtisadi rayonunda bu kimi təxribatların qarşısının bundan sonra da qətiyyətlə alınması barədə müvafiq göstərişlər verib. Şübhəsiz, ordumuz bu göstərişin öhdəsindən layiqlə gələcək. Bütün bunlar isə o deməkdir ki, hayların Qarabağda kənd təsərrüfatı işləri adı altında səpmək istədikləri “toxumlar” bundan sonra heç zaman cücərməyəcək.
