Bir təbəssümdə əks olunan reallıq
BMT Təhlükəsizlik Şurasının Qarabağda humanitar vəziyyətə həsr olunmuş iclasındakı uğursuzluqdan sonra separatçılarda isterik durum yaranıb. Mövcud durumun doğurduğu gərginlik özünü separatçı rejimin daxilində daha qabarıq şəkildə göstərməkdədir. Rejimin “rəhbəri” Araik Arutyunyanla sabiq “dövlət naziri” Ruben Vardanyan arasındakı konflikt artıq pik həddə çatıb. Bütün bunların fonunda separatçılar Laçın sərhəd-buraxılış məntəqəsi ilə bağlı mənfi rəylər formalaşdırmaqda, həmçinin Qarabağ iqtisadi rayonunda yaşayan mülki əhalinin reinteqrasiyasına mane olmaqda davam edirlər. Üstəlik, separatçılar mülki əhalini zorla hərbi təlimlərə cəlb edir, silahlandırır, onların bazasında “könüllü dəstələr” formalaşdırırlar. Bununla da mülki əhalini terrorcuya çevirirlər. Qeyd edək ki, bu prosesdə separatçı rejimin ölkəmizə münasibətində barışmaz mövqe tutan, Azərbaycan torpaqlarında milli sərvətlərin qanunsuz istismarı ilə öz sərvətini artıran rusiyalı erməni milyarder Ruben Vardanyanın rəhbərlik etdiyi qondarma ictimai təşkilat – “artsax təhlükəsizlik və inkişaf komitəsi” daha çox canfəşanlıq göstərir.
Separatçılar, o cümlədən Ruben Vardanyan utanıb-qızarmadan Laçın yolu ilə bağlı mənfi rəylərin, həmçinin mülki əhalinin silahlanmasını, hərbi təlimlərdə iştirakını rəsmi Bakının yürütdüyü siyasətdən, ölkəmizin qanunları çərçivəsində yaşamaq istəmədiklərindən qaynaqlandığını iddia edirlər. Halbuki Azərbaycanın həyata keçirdiyi siyasət regionda sülhün, təhlükəsizliyin qorunmasına yönəlib. Bəs əslində vəziyyət necədir?
Bu günlərdə Xankəndi-Gorus istiqamətində Laçın sərhəd-buraxılış məntəqəsindən keçən Elen Arstamyan adlı tələbə qız azərbaycanlı jurnalistlərlə söhbətində buraxılış məntəqəsindən sərbəst keçidin təmin olunmasından, həmçinin azərbaycanlıların göstərdiyi isti münasibətdən razılıqla söz açıb. O, Laçın sərhəd-buraxılış məntəqəsində yoxlamaların həm qanuni, həm də zəruri olduğunu vurğulayıb. Özü də o, fikirlərini təbəssümlə, yəni gülümsəyərək bildirib. Təbəssüm isə, hər şeydən əvvəl qəlbin sevincidir. Elenin bu təbəssümündə onun Azərbaycanı alqışlaması, Ermənistanın apardığı işğalçılıq siyasətini, həmçinin separatçıları lənətləməsi açıq-aydın hiss olunurdu. Şübhəsiz, onun bu təbəssümünü Qarabağın etnik erməni sakinlərinin Azərbaycanın bölgədə həyata keçirdiyi siyasəti, o cümlədən təklif etdiyi reinteqrasiyanı müsbət qəbul etmələrinin, dəstəkləmələrinin göstəricisi hesab etmək olar.
Quldurların əlindən cana doymuş Qarabağın erməni sakinləri arasında isə Elen kimi düşünənlərin sayı çoxdur. Amma onlar hələlik Azərbaycan vətəndaşlığını qəbul etməkdə konkret addımlar atmağa, separatçıların girovluğundan azad olmağa, Ermənistanla Azərbaycan arasında normallaşma prosesinə töhfələrini verməyə özlərində cəsarət tapmırlar. Çünki qondarma rejimin “prezidenti” Araik Arutyunyanın, eləcə də Vardanyanın və digərlərinin quldur dəstələrindən qorxurlar. Bu da quldurların Qarabağda yaşayan ermənilərin başı üzərində “Damokl qılıncı” kimi asılmasından bir daha xəbər verir. Yeri gəlmişkən qeyd edək ki, artıq Elen separatçıların hədəfinə tuş gəlib. Üstəlik, 17 yaşlı bu tələbə qız daşnakların təkidi ilə sosial şəbəkələrdə tənqid olunmaqdadır.
Bütün bunlara rəğmən rəsmi Bakı Qarabağ ermənilərinin Azərbaycanın siyasi, hüquqi və sosial-iqtisadi çərçivəsinə yenidən inteqrasiyasına nail olmağa çalışır. Elenin təbəssümü də göstərir ki, rəsmi Bakı getdkicə istəyinə çatmaqdadır. Ölkəmizin Konstitusiyamızda nəzərdə tutulmuş, habelə Azərbaycanın tərəfdar çıxdığı insan hüquqları üzrə bütün müvafiq beynəlxalq mexanizmlərə uyğun olaraq apardığı reinteqrasiya siyasətinə isə gec-tez özlərində cəsarət tapıb mülki əhalinin əksəriyyətinin səs verəcəyi şəksizdir. Çünki onlar başa düşürlər ki, Qarabağın Azərbaycana inteqrasiyası labüddür. Artıq bu məsələdə dünyanın əksər dövlətləri, həmçinin beynəlxalq qurumlar da ölkəmizi dəstəkləyirlər. Bir sözlə, hazırda yaranan şərait və bütün şərtlər Qarabağda yaşayan erməni əhalisinin Azərbaycan cəmiyyətinə reininteqrasiya dövrünün gəlib çatdığını diktə edir. Bunu mülki əhalini özlərinə alət etmək istəyən, girovluqda saxlayan arutyuyanlar, vardanyanlar və digər yanlar da yaxşı anlayırlar. Buna rəğmən hələ ki, onlar ətəklərindəki daşı tökmək istəmirlər. Yəni, “yeni reallıqlar” formalaşdırmağa cəhd edirlər. Amma tökəcəklər. Bununla da separatçılar regiona yeni reallıqlar gətirən Azərbaycanın nəyə qadir olduğunun bir daha şahidi olacaqlar.
