Gəl bir çay içək…
Çox vaxt tanışlıq, münasibət və ünsiyyət, hətta uzun illərin dostluğu bu dəvətdən, bir stəkan çaydan başlanır. Bəzən adi məişət ritualı təsiri bağışlayan bir stəkan çay ən xoş təmas və münasibətin başlanğıcına çevrilir.
ARANTV.AZ xəbər verir ki, dekabrın 15 qeyd olunan Çay Günü süfrələrimizin ən çox sevilən, ilin istənilən fəslində və günün hər vaxtı qəbul edilən içkisi haqqında söhbət açmaq təsadüfi deyil: təqvimin bir günü də hər gün içdiyimiz çaya ayrılıb.
Yayın qorabişirən istisində ürəyimiz yananda çətin ki, ayran, atlama, limonad, kola, fanta içib sərinləyəsən. Ya gərək su, ya da gərək çay içəsən.
Hansısa ziyafət, qonaqlıq, məclis, ləziz yemək süfrəsi olursa-olsun, mütləq onun sonu çay süfrəsi ilə yekunlaşmalıdır. Çayla yekunlaşmayan süfrə bir növ natamam olur. Hətta xalqımızın uzun illərdən gələn belə bir ənənəsi də var: qız evinə elçi gedəndə və razılıq alınanda mütləq şirin çay içilməlidir. Bu, gənclərin izdivacına xeyir-dua vermək əlaməti sayılır.
Çayın sağlamlıq üçün faydasını da qeyd etmək lazımdır, xüsusilə mövsümü soyuqdəymələr zamanı onun qəbulu çox xeyirlidir. Ağır və yağlı yeməklərdən 1 saat sonra qəbul olunması həzm prosesini asanlaşdırır. Ona rəng verən birləşmələr damar çəpərlərini gücləndirir, beyin də daxil olmaqla bütün orqanlarda hər cür qanaxma riskini azaldır. Çay içilməsi qan dövranını yaxşılaşdırır, diş minasını möhkəmləndirir, bədəni zərərli maddələrdən təmizləyərək böyrəklərin daha yaxşı işləməsini təmin edir.
Çay könlümüzə rahatlıq və dinclik gətirən içki olmaqla yanaşı, həm də mədəniyyət nişanəsidir. Heç bir məclisi – rəsmi danışıq tədbirindən tutmuş adi dost süfrəsinə qədər onsuz təsəvvür etmək olmaz. Görünür, elə buna görə də onun şəninə söz, şeir qoşublar, mahnı bəstələyiblər. İllərdir ki, belə mahnılardan biri çayın özü kimi ürəklərə sərinlik çiləyir:
Armudu stəkanda çay,
Ürəyimiz yananda çay…
Hətta belə də bir ifadə var: Çayın biri qaydadı, ikisi cana faydadı, çıxdın beşə, vur on beşə.
Armudu stəkanda buğlanan pürrəngi çay…
Həm ətirlidir, həm də dadlı…
