Oğuz sakinindən maraqlı təşəbbüs FOTO VİDEO
Oğuzun Xaçmazqışlaq kəndinin məhəllə və döngələrində Azərbaycanın tanınmış ədəbiyyat və incəsənət xadimlərinin, Milli qəhrəmanların lövhələrinin quraşdırılması insanlar tərəfindən böyük maraqla qarşılanıb.
ARANTV.AZ xəbər verir ki, bu maarifləndirici və vətənpərvər ideyanı həyata keçirən şəxs elə həmin kəndin sakini, təqaüdçü Əbülfət Əsgərovdur.
Xaçmazqışlaq kəndi altı məhəllədən ibarətdir. Həmin məhəllələrə yerli sakinlər tərəfindən Azərbaycanın tarixi, mədəniyyəti və incəsənətində, eləcə də Qarabağ müharibəsində göstərdiyi şücaətlərə görə fərqlənən insanların adları verilib, burada onların lövhələri quraşdırılıb. Məsələn, kəndin girişində olan ilk məhəllə sakinlər tərəfindən bəstəkar Qara Qarayevin adı ilə tanınır. Milli qəhrəmanlar Polad Həşimov və Mübariz İbrahimov, şairlər Səməd Vurğun və Molla Pənah Vaqifin də adlarına məhəllələr var.
Kəndi addım-adım, məhəllə-məhəllə gəzirik. Məktəbdən evə dönən şagirdlərlə Molla Pənah Vaqifin adını daşıyan məhəllənin girişində qarşılaşırıq. Fürsətdən istifadə edib, məktəblilərə tanıdıcı lövhələrlə bağlı suallar ünvanlayırıq. Məlum olur ki, onlar artıq xeyli müddətdir yaşadıqları məhəllənin adını daşıyan şəxsiyyətlərlə bağlı məlumatlar toplayır və yeri gələndə dərsdə, ya da elə məhəllədə həmin şəxsiyyətlərlə bağlı intellektual oyunlar təşkil edirlər.
XI sinif şagirdi Hikmət Salehli Molla Pənah Vaqif, Səbinə Atakişili isə Nizami Gəncəvi məhəlləsində yaşayırlar. Dərsə bir yerdə gedib-gəlsələr də, hər gün təmsil etdikləri məhəllənin adının verildiyi şəxsiyyət haqqında maraqlı nəsə öyrənməyə, bir-birinə suallar verməyə çalışırlar.
Kənd sakini Eyvaz Süleymanov Nizami Gəncəvi məhəlləsində yaşayır. Dahi şəxsiyyətin tanıdıcı lövhəsi onun evinə yaxın məsafədə yerləşir. Deyir ki, bu ideyanın həyata keçirilməsi gənc nəsil üçün çox önəmlidir. Belə ki, kəndə qonaq gələndə onun hansı məhəlləyə gedəcəyini uşaqdan-böyüyə hamı ilk anda təyin edir. Digər tərəfdən, yeniyetmə və gənclər ədiblərimizi, qəhrəmanlarımızı tanımış olurlar.
Maarifləndirici və vətənpərvər layihə barədə yetərincə məlumat toplayandan sonra onun ideya müəllifi Əbülfət Əsgərovla görüşürük. İxtisasca iqtisadçı, hazırda isə təqaüddə olan Əbülfət müəllim deyir ki, layihəni reallaşdırmaq onun çoxdankı arzusu olub və bu barədə çox fikirləşəndən sonra qərar verib: “Düşündüm və qərara aldım ki, kənddə məhəllələrə adlar verək. Məsələn qonaq gələndə bilər ki, hansı məhəllədəki evə getmək lazımdır və oranı çox rahat tapar. Fikirləşdim ki, tanınmış şəxsiyyətlərimizin adlarının verilməsi daha yaxşı olar. İlkin olaraq Qara Qarayevi seçdim. Ona görə ki, Qara Qarayev musiqiçilər arasında bir akademikdir, dünyada tanınır. Kəndin girəcəyinə Qara Qarayev adını ona görə verdik ki, hansı kənddə musiqi varsa, orada əmin-amanlıq var, sülh var”.
Müsahibimiz Səməd Vurğunun bu kənddə qonaq olduğunu, uzun illər Xazmazqışlaqdakı dostları ilə əlaqələr saxladığını bildirir və bu baxımdan həmin məhəllənin girişində onun tanıdıcı lövhəsinin quraşdırıldığını söyləyir.
Digər şəxsiyyətlərin də Vətən, dövlət qarşısında xidmətlərini bir-bir sadalayan həmsöhbətimiz, həm də dərin zəka və analitik biliyə malik olduğunu ortaya qoyur.
Əbülfət müəllim bizə kəndin girəcəyində şəhidlərin xatirəsinə ucaldılan abidə kompleksi barədə də məlumat verdi. Bildirdi ki, kompleksin qarşısında qoşa bulaq inşa olunub. Bu abidəni ucaltmaqda məqsəd gəncləri vətənpərvər ruhda böyütməklə yanaşı, həm də nişanlanan, yeni ailə həyatı quran gənclərin həmin bulaqdan su içib əhd-peyman bağlamaları, bir-birinə sədaqətli olmalarıdır. Artıq bir müddətdir, kənddə ailə həyatı quran gənclər bu məkana gələrək şəhidləri anır, həm də qoşa bulaqdan su içərək gözəl ənənəni yaşadırlar.
