Bir əlində xonçası, açıb gülün qönçəsi… – FOTOREPORTAJ
Yurdumuza yaz gəlib. Hər yerdə – təzəcə qönçələməyə hazırlaşan çılpaq budaqdan tutmuş gah buludların nur ələdiyi, gah yaz günəşinin ilıq şəfəqlərinin səpələndiyi göy üzünə, ilmə-ilmə, naxış-naxış yaşıl donunu əyninə geyinən çöl-çəmənə qədər hər yerdə onu duymaq, hiss etmək mümkündür. Öz köçünü çəkib gedən qış sərt üzünü göstərməyə çalışsa da, zaman öz hökmünü verib – artıq sazaqlı-şaxtalı günlər arxada qalıb. Təbiət yaz nəğməsi oxuyur.
Paytaxt Bakı şəhərində Novruz ovqatı davam edir. Bakı sakinləri və şəhərimizin qonaqları bayram günlərində bəzənmiş küçə, park, meydan və xiyabanlarda bir-birindən maraqlı tədbirlərə, rəngarəng bayram proqramlarına şahidlik edirlər. Şəhərin ayrı-ayrı guşələrini xalqımızın ən sevimli bayramı olan Novruzun ən əsas simvolu olan yaşıl donlu, qırmızı qurşaqlı səməni fiqurları bəzəyir. Küçə və yolların, tarixi abidələrin ətrafında müxtəlif bayram atributları, milli ornamentlər quraşdırılıb. Səməni, Bahar qızı, Kosa, Keçəl və digər Novruz atributları ilə bəzədilən meydanlar zövq oxşayır.
AZƏRTAC Bakının Novruz bayramı günlərini əks etdirən görüntüləri təqdim edir.
Novruzla əlaqədar bayram libası geyinən Dənizkənarı Milli Park, Qız Qalasının ətrafı, Fəvvarələr meydanı xalq oyun və məzhəkələrinin əsas ünvana çevrilib. Hər tərəf səməni, şəkərbura, paxlava, qoğal, yumurta, çərəz və digər bayram atributları ilə bəzədilib, rəngarəng işıqlar göz oxşayır. Parklarda al-əlvan güllərdən ibarət kompozisiyalar quraşdırılıb, ictimai iaşə və xidmət obyektlərinin vitrinləri, köşklər al-əlvan naxışlara bürünüb.
Yazın gəlişi, təbiətin oyanışı Novruzla başlayır və xalqımız bu bayramı xüsusi coşqu ilə qeyd edir. Xüsusilə uşaqlar bayramda nümayiş olunan maraqlı və əyləncəli proqramdan ləzzət alır, qədim tamaşa və oyunları maraqla izləyirlər. İp üstündə nömrələr göstərən kəndirbazın, qeyri-adi gücünü nümayiş etdirən pəhləvanın çıxışı, Novruzun əsas personajlarından olan Kosa və Keçəlin əyləncəli oyunları onlara xoş təsir bağışlayır.
Paytaxtın ayrı-ayrı rayonlarında Novruz bayramına həsr olunmuş konsert proqramları keçirilir.
Musiqi sədaları pərdə-pərdə ətrafa yayılır:
Novruz gəlir, yaz gəlir,
Bir əlində saz gəlir.
Bir əlində xonçası,
Açıb gülün qönçəsi.
Bülbülə avaz gəlir,
Novruz gəlir, yaz gəlir.
Qeyd edək ki, Novruz xalqımızın ən qədim və ən yüksək dəyərləri özündə birləşdirən bayramdır. Novruzun qeyd edilməsi yazın qarşılanması anlamına gəlir.
Yaz fəsli martın 20-də Bakı vaxtı ilə saat 07:06:21-də yurdumuza qədəm basıb.
Xatırladaq ki, martın 20-21-i Azərbaycanda Novruz bayramı qeyd edilir. Nazirlər Kabineti tərəfindən təsdiqlənən müvafiq qərara əsasən bu il martın 20-dən 27-dək Novruz bayrami ilə əlaqədar qeyri-iş günləridir.
