YAP xalqın iradəsinin ifadəçisidir
2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 99 saylı Bərdə seçki dairəsindən deputatlığa namizədliyi irəli sürülmüş Fatma Yıldırımın rayonun Qarağacı və Mollagüllər kəndlərində seçicilər ilə görüşü keçirilib.
Görüşlərdə Ümummilli Lider Heydər Əliyevin və torpaqlarımızın ərazi bütövlüyü və suverenliyimiz uğrunda həlak olan bütün şəhidlərin əziz xatirəsi bir dəqiqəlik sükutla yad edilib.
Görüşləri giriş sözü ilə açan YAP Bərdə rayon təşkilatının sədri Fəqət Şadlinskaya bildirib ki, Azərbaycanın addım-addım hədəflərə doğru inamla irəlilədiyinin şahidi olan xalq hər zaman Heydər Əliyev yolunun davamına dəstəyini ölkə Prezidentinin ətrafında sıx birləşməsi, Yeni Azərbaycan Partiyasına böyük inamı, etimadı ilə ifadə edir.
Çıxış edən deputatlığa namizəd Fatma Yıldırım qeyd edib ki, ölkəmiz demokratik dəyərlərə sadiqliyini hər zaman atdığı addımlarla təsdiqləyir. O, yeni hədəflərin gerçəkləşdirilməsi ilə qalib, bütövləşən Azərbaycanın gücünün, qüdrətinin daha da artdığını, beynəlxalq mövqeyini daha da möhkəmləndirdiyini əlavə edib.
Görüşlərdə YAP Bərdə rayon təşkilatı təbliğat qrupunun üzvləri şəhid anaları Mehparə Qəribova, İsbət Hətəmova, Radə Qurbanova çıxış edərək seçiciləri səsləri ilə YAP-ın namizədinə dəstək olmağa çağırıb. Qarağacı kəndində çıxış edən qazi Arzu Səlimov, qazi Əfsun Vəliyev, Nuranə Seyidova, Elsevər Abbasov, Xəyalə Manafova, Mollagüllər kəndində Yusif Yusifov, Əbülfəz Göyüşov, qazi Pünhan Əliyev və digərləri bəyan ediblər ki, uğurlarımızın davamı naminə qarşıdan gələn parlament seçkilərində YAP növbəti möhtəşəm qələbəsini qazanacaq.
Görüşlərdən sonra isə deputatlığa namizəd Fatma Yıldırım YAP Bərdə rayon təşkilatı təbliğat qrupunun üzvləri ilə birlikdə Mollaisalar kənd sakini Mehman Abdüləzimovun, Mollagüllər kəndində qazi Pünhan Əliyevin, Qayalı kəndində isə şəhid Mirpaşa Mehdizadənin ailəsində olub.
