Məktəblinin qida çantası necə hazırlanmalıdır? – AÇIQLAMA
Məktəb dövrü uşaqlarda daha çox intensiv boy artımı, skeletin və əzələlərin böyüməsi ilə müşayiət olunur. Buna görə də düzgün qidalanma bu dövürdə xüsusi əhəmiyyət kəsb edir. Məktəbli çantası hazırlanan zaman valideyinlər tənəfüslərdə istifadə üçün kiçik yemək çantaları da hazırlayır.
Bəs bu çantalara qoyulan yeməklər hansı ingredientlərdən ibarət olmalıdır?
Mövzu ilə bağlı BiG.AZ-a açıqlama verən sağlam qida təbliğatçısı Asim Vəliyev bildirib ki, valideynlərin məktəb çantalarına sağlam və balanslı qidalar yerləşdirməsi uşaqların fiziki və zehni inkişafı üçün çox önəmlidir:
“Uşaqların zəhərlənməsinin qarşısını almaq üçün qidaların keyfiyyətinə və saxlama şəraitinə diqqət yetirmək lazımdır. Məktəb çantası üçün vitaminli və sağlam qidaların seçilməsi zamanı bir sıra tövsiyələri nəzərə ala almalıyıq. Alma, armud, üzüm, portağal, banan kimi təzə meyvələr vitaminlə zəngindir və uşaqlar üçün çox faydalıdır. Yerkökü, xiyar, balqabaq dilimləri uşaqların gündəlik vitamin və lif ehtiyaclarını qarşılamaq üçün yaxşı seçimdir. Qoz, badam, fındıq, kişmiş kimi quru meyvələr və çərəzlər enerji verir və beyin funksiyalarını dəstəkləyir. Quru meyvə qarışıqları da uşaqların həm toxluq hissini təmin edir, həm də qida dəyəri yüksəkdir.Tam buğda çörəyi ilə hazırlanmış sendviçlər içərisinə ət, toyuq, pendir və ya tərəvəzlər əlavə etməklə qidalı və enerji dəyəri yüksək bir yemək hazırlamaq mümkündür”.
Asim Vəliyev vurğulayıb ki, yoğurt və kefir kalsium baxımından zəngindir və uşaqların sümük sağlamlığı üçün vacibdir:
“Onları təbii meyvələrlə birləşdirmək həm dadlı, həm də faydalıdır. Pendir dilimləri də yaxşı bir protein mənbəyidir. Uşaqların su istehlakı vacibdir. Məktəb çantasına hər zaman təmiz su qabı əlavə etmək lazımdır. Şirələr və qazlı içkilərdən isə uzaq durmaq məsləhətdir. Zəhərlənmənin qarşısını almaq üçün təzə və saxlanma şəraiti düzgün qidalar seçməliyik. Məhz asan xarab olmayan qidalar seçmək zəhərlənmə riskini azaldır. Meyvələr və quru qidalar bu baxımdan daha təhlükəsizdir.Əgər uşağa tez xarab olan məhsullar (yoğurt, pendir, ət məhsulları) veririksə, istilik qoruyucu çantalardan istifadə etmək lazımdır. Qidanı saxladığınız qabların keyfiyyətinə də valideyinlər xüsusi diqqət yetirməlidir”.
