Çərşənbə günü Heydər Əliyev Beynəlxalq Aeroportunda Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevə Pakistan Aviasiya Kompleksi və “Chengdu” Çin Aviasiya Korporasiyasının birgə layihəsi olaraq hazırlanmış “JF-17C” (Block-III) təyyarələri təqdim olunub. Azərbaycanın müdafiə naziri, general-polkovnik Zakir Həsənov və Pakistan Aviasiya Kompleksinin sədri, vitse-marşal Hakim Raza dövlətimizin başçısına təyyarələrin taktiki-texniki xüsusiyyətləri, istismar qaydaları və digər göstəriciləri barədə məlumat veriblər.
Maraqlıdır, artıq Azərbaycan Hərbi Hava Qüvvələrinin arsenalına daxil edilən “JF-17C” (Block-III) birmühərrikli çoxməqsədli döyüş təyyarələri hansı xüsusiyyətlərə malikdir?
Bu barədə Medianews.az-a danışan Heydər Əliyev adın Hərbi İnstitutun baş müəllimi, ehtiyatda olan polkovnik-leytenant Vüqar Əliyev bildirib ki, hər bir dövlət öz silahlı qüvvələrini yaradan və modernləşdirən zaman gələcək döyüş əməliyyatlarının forma və metodlarını, ehtimal rəqibinin imkan qabiliyyətlərini nəzərə alır.
Onun sözlərinə görə, bu amillərə müharibə teatrı da daxildir: “Azərbaycan Silahlı Qüvvələrinin modernləşdirilməsi və döyüş qabiliyyətinin yüksəldilməsi 44 Günlük Vətən Müharibəsinin analizi əsasında, Azərbaycanın Silahlı Qüvvələrinin Ali Baş Komandanı, Azərbaycan Respublikasının Prezidenti İlham Əliyevin tapşırıqları və sərəncamları ilə həyata keçirilir. Azərbaycan ərazisi kiçik olan dövlətdir. Məhz bu səbəbdən Azərbaycana uzaq uçuş mənzilli, ağır bombalar və silahlar daşıya biləcək, təyyarə daşıyan gəmilərə enə və start götürə biləcək aparatlar lazım deyil. Azərbaycana daha manevrli, kiçik qabaritli, sürətli və eyni zamanda rəqibi uzaqdan aşkar edə biləcək və ona uzaq məsafələrdən effektiv zərbələr vura biləcək, Hava Hücumundan Müdafiə sisteminə inteqrasiya olunan aparatlar lazımdır. Belə qabaqcıl texnologiyalardan biri də “JF-17C” (Block-III) döyüş təyyarələridir. Bu təyyarələr hava döyüşlərinin aparılması və yerüstü hədəflərə hücum üçün nəzərdə tutulub. “JF-17C” (Block-III) təyyarələrinin alınması ilə bağlı müqaviləyə döyüş sursatlarının tədarükü və pilot hazırlığı da daxildir. Azərbaycan Silahlı Qüvvələri hərbi təyyarə parkını sinfinə görə tamamilə “JF-17” (Blok-III) döyüş təyyarələri ilə əvəz edəcək. Yəni 60-a yaxın “JF-17C” (Blok III) təyyarəsi alınacaq”.
Hərbi ekspert vurğulayıb ki, “JF-17C” (Block-III) hava-hava və hava-yer döyüş qabiliyyətinə, eləcə də orta və aşağı hündürlüklərdə yüksək döyüş manevrinə malikdir, effektiv atəş gücünə görə seçilir: “Təyyarənin maksimum sürəti 1910 km/s, uçuş məsafəsi 2037 km, uçuş yüksəkliyi 15 240 metrə qədərdir. Təyyarənin silahları arasında ikilüləli top, 4 ədəd idarə olunanan “hava-hava” raketi, bir ədəd “hava-yer” raketi, idarə olunmayan raketlər, 15 ədədə qədər müxtəlif növ bomba var. “JF-17” öz xüsusiyyətlərinə görə “MİQ-29”, “SU-25” təyyarələrindən üstündür və “S-300” Raket Əleyhinə Müdafiə (RƏM) sistemlərinə qarşı dura bilir. “JF-17” döyüş təyyarəsinin ən son təkmilləşdirilmiş versiyası Çinin “J-20” gizli təyyarələri tərəfindən də istifadə edilən ən qabaqcıl “PL-10” hava-hava raketi ilə təchiz edilib. Çin və Pakistanın birgə inkişaf etdirdiyi yüngül qırıcı, hava döyüşlərində rəqiblərindən üstündür”.
V.Əliyev deyib ki, “PL-10” hava-hava tipli raketlər öz sinfində ən yaxşısıdır, əvvəlki “JF-17” qırıcı təyyarələr köhnə “PL-5” raketləri ilə təchiz edilmişdi: “JF-17” (Blok-III) döyüş təyyarələri tərəfindən daşınan “PL-10” raketləri Cənubi Çinin Quandun əyalətinin Çjuhay şəhərində “Airshow China 2018” sərgisində debüt etmiş “PL-10E”nin ixrac variantıdır. “PL-10E” dördüncü nəsil hava-hava raketidir və ABŞ-nin “AIM-9X” ilə eyni səviyyədə dünyanın ən qabaqcıl raketlərindən biridir. İnfraqırmızı təyinat, aerodinamik dizayn və digər qabaqcıl texnologiyalar sayəsində heç bir təyyarə, hətta gizli olanlar belə, “PL-10” raketlərindən yayına bilmir. “PL-10” raketləri ilə “JF-17” (Blok-III) döyüş təyyarələri yüksək hava döyüş qabiliyyəti əldə edib və ölkənin hava hücumundan müdafiə sistemində daha da ağır rəqiblər üzərində üstünlüyə malik olacaq”.
Ehtiyatda olan polkovnik-leytenant söyləyib ki, “PL-10” ilə yanaşı, JF-17 (Blok-III) döyüş təyyarələri daha təkmil radarla təchiz edilib: “Bu radar havadan aktiv elektron skan edən və atəşə nəzarət sistemləri ilə təchiz olunub. Radar dünyanın ən yaxşılarından biridir. İlk “JF-17” (Blok-III) döyüş təyyarələrinin prototipi ilk dəfə 2019-cu ilin dekabrında Çinin cənub-qərbindəki Sıçuan əyalətinin Çenqdu şəhərində səmaya qalxıb. Digər texnologiyalardan “J-10C” və “J-16” tərəfindən istifadə edilən qabaqcıl infraqırmızı raket xəbərdarlığı sisteminə əlavə olaraq, yeni və daha böyük holoqrafik geniş bucaqlı baş üstü displey inteqrasiya edilmiş kokpit displeyi “JF-17” (Blok-III) döyüş təyyarələrində istifadə olunur”.
