“Azərbaycanın xarici siyasətində beynəlxalq təşkilatlarla əməkdaşlıq xüsusi yer tutur. Xüsusilə, İkinci Qarabağ müharibəsindən sonra Azərbaycan fəal xarici siyasət həyata keçirir. İstər region, istərsə də qeyri-region ölkələri ilə əlaqələri dərinləşdirir. Təbii ki, bu əlaqələrdə ölkəmiz siyasi, iqtisadi maraqlarını nəzərə alaraq addımlar atır”.
Bu fikirləri Musavat.com-a Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru Mətin Məmmədli Azərbaycanın D-8-ə üzvlüyü ilə bağlı şərhində bildirib.
O vurğulayıb ki, Azərbaycanın D-8 formatına daxil olan ölkələrlə müxtəlif səviyyələrdə, hətta Türkiyə ilə müttəfiqlik əlaqələri var:
“Hesab edirəm ki, D-8-ə qoşulmaqla Azərbaycan sözügedən ölkələrlə əlaqələri daha da dərinləşdirmək imkanı əldə edəcək. Nəzərə almaq lazımdır ki, D-8-ə daxil olan ölkələrin əhalisi dünya müsəlmanlarının 60 faizini əhatə edir. Bu ölkələrin çox böyük iqtisadi potensialı var. Bu baxımdan D-8 Azərbaycanın xarici siyasətinə uyğun formatdır. Ölkəmiz çoxvektorlu xarici siyasətində müxtəlif güc mərkəzlərini və beynəlxalq təşkilatları nəzərə alır”.
Mətin Məmmədlinin fikrincə, Azərbaycan da D-8 ölkələri üçün maraqlı ölkədir:
“Azərbaycanın coğrafi, geosiyasi mövqeyi, malik olduğu resurslar ölkəmizi D-8 ölkələri üçün cəlbedici edir. Onu da nəzərə almaq lazımdır ki, bu, təşkilatın ilk genişlənməsidir. Təşkilat 1996-cı ilin oktyabr ayında Türkiyənin təşəbbüsü ilə yaradılıb. Son 27 ildə ilk dəfə genişlənmədə Azərbaycanın üzv seçilməsi ilə təşkilatın daha da genişlənməsi üçün müəyyən zəmin yaranmış oldu”.
