Bura məskənidir gözəlliklərin…
Azərbaycanın əsrarəngiz təbiəti türk qardaşlarımızı cəlb edir
Ölkəmiz 1991-ci ildə dövlət müstəqilliyi bərpa edəndən sonra yetmiş il əvvəl qırılmış Azərbaycan-Türkiyə əlaqələri sürətlə möhkəmləndirildi. Bir-birinə gediş-gəliş başladı və bu ünsiyyət getdikcə intensiv xarakter aldı. Qardaş ölkədən gələn müsafirlər respublikamızın əsrarəngiz gözəlliklərini gördülər və sevdilər. COP29 konfransında iştirak edən Türkiyə nümayəndə heyətinin üzvləri ölkəmizin tarixi və təbii mənzərələri ilə tanışlıqdan məmnun olduqlarını bildirdilər.
Hələ 2021-ci ildə bu əsrarəngiz şəhərə ilk səfər edən zaman Şuşanın füsunkar gözəlliklərini, Cıdır düzünü və dumanlı dağları seyr edən Türkiyə Prezidenti Rəcəb Tayyib Ərdoğan bu diyara heyran qaldığını bildirdi. Qardaş ölkədə Azərbaycanın gözəl mənzərələrini görmək arzusunda olanların sayı İkinci Qarabağ müharibəsindən sonra daha da artmağa başlayıb. Axı, ölkəmizin uca dağları, yaşıl meşələri, gölləri, çayları, bulaqları və digər mənzərələri cəlbedicidir. Digər tərəfdən, Şuşa və işğaldan azad edilən yerlərdə aparılan tikinti, yenidənqurma və bərpaetmə işləri yüksək keyfiyyətlə həyata keçirilib. Dağıdılmış maddi-mədəniyət abidələri təmir edilərək əvvəlkindən də gözəl şəklə salınıb.
Azərbaycanın turizm imkanları Türkiyənin İstanbul şəhərində işinə başlayan Şərqi Aralıq dənizi Beynəlxalq Səyahət və Turizm Sərgisində (“EMITT – 2025”) təbliğ olunur. Sərgi çərçivəsində milli stenddə 10 yerli turizm sənayesi nümayəndəsi və “Azərbaycan Hava Yolları” QSC (AZAL) təmsil olunur.
Ziyarətçilərə Azərbaycanın turizm imkanları, o cümlədən qastroturizm, şərabçılıq, qış turizmi və dağ-xizək mərkəzləri, UNESCO-nun Ümumdünya İrs Siyahısında yer alan maddi-mədəni irs nümunələri barədə ətraflı məlumatlar verilir. Həmçinin Türkiyə və digər ölkələri təmsil edən turizm sektoru nümayəndələri ilə B2B formatında görüşlər təşkil edilir.
Dünyanın beş böyük turizm sərgisindən biri hesab olunan Şərqi Aralıq Dənizi Beynəlxalq Səyahət və Turizm Sərgisində (“EMITT – 2025”) 95 ölkə təmsil olunur. Bu, hər bir ölkə, o cümlədən də Azərbaycan turizminin inkişafı üçün də geniş imkanlar deməkdir. Orada Azərbaycan bu sahədə özünə yeni tərəfdaşlar da tapa bilər. Digər tərəfdən, qeyri-neft sektorunun inkişafına hüdudsuz üfüqlər açılacaqdır. Təbii ki, yetmiş il üzümüzə bağlı qalmış qapıdan içəri keçmək, babalarımızın uyuduğu müqəddəs yerləri ziyarət etmək çox arzuolunandır. Bununla bərabər, türkiyəli qardaşlarımız üçün də burada müqəddəs və maraqlı yerlər var. Bu yerlərin biri 1918-ci ildə Azərbaycana xilaskarlıq yürüşü edən Nuru Paşanın ordusu ilə bağlıdır. Şamaxı ərazisində birləşmiş erməni-bolşevik ordularına qarşı gedən amansız döyüşlərdə Azərbaycanın azadlığı uğrunda canını qurban vermiş qəhrəman türk əsgərlərinin məzarları müqəddəs tarixi yerdir. Biz daim o məzarları minnətdarlıq hissi ilə ziyarət edirik. Məktəblilər oraya ekskursiyaya aparılır, qardaşlarımızın məzarları ziyarət olunur. İlin bütün fəsillərində həmin qəhrəmanların məzarları üzərinə tər gül-çiçək dəstələri düzülür. Onlar bizim qəlbimizdə və tariximizdə əbədi yaşayacaqlar. Eyni zamanda, Türkiyənin Azərbaycandakı səfirliyi, ictimaiyyətin nümayəndələri unudulmaz qəhrəmanların məzarını ziyarətə gəlirlər.
Türkiyəli qardaşlarımızı daha çox maraqlandıran Ermənistanın işğalından azad edilmiş ərazilərimizdəki mənzərəli yerləri seyr etməkdir. Çünki o yerlərdə qədim türklərin-babalarımızın ayaq izləri var. Dini və tarixi məkanlarımız müsafirlər üçün maraqlıdır.
2024-cü ildə Türkiyə Azərbaycana səfər edən xarici ölkə vətəndaşlarının sayına görə ikinci yerdə qərarlaşıb. Ötən il ərzində Türkiyədən ölkəmizə 426 241 nəfər olmaqla 2023-cü ilin rəqəmlərindən 13 faiz çox ziyarətçi gəlib. Əminik ki, yaxın illərdə qardaş ölkədən respublikamıza turizm gəzintisinə, istirahətə və səyahətə gələnlərin sayına görə birinci yerə yüksələcək. Çünki onlar bizimlə qırılmaz tellərlə bağlıdırlar. Bu bağın daha da möhkəmlənməsində digər amillərlə bərabər, turizmin də böyük əhəmiyyəti var.
Vəli İlyasov, “İki sahil”
