Yoxlamalar estetik əməliyyatı bahalaşdırdı – Plastik cərrahlar deyir ki…
Mütəxəssislərin sayının azalması və bəzi klinikaların fəaliyyətini dayandırması qiymətlərə necə təsir edib?
Son aylarda plastik cərrahların peşə fəaliyyətinin qanuni əsasları ilə bağlı aparılan yoxlamalar sektorda ciddi dəyişikliklərə səbəb olub. Səhiyyə Nazirliyi və Baş Prokurorluq tərəfindən həyata keçirilən araşdırmalar nəticəsində bir neçə cərrahın sertifikasiyası ləğv edilib. Hazırda araşdırmalar davam edir.
Mütəxəssislərin sayının azalması və bəzi klinikaların fəaliyyətini dayandırması isə plastik və estetik xidmətlərin qiymətlərinin artmasına gətirib çıxarıb. Mətbuatda və sosial şəbəkələrdə yayılan məlumatlara görə, bu sahədə çalışan həkimlər xidmət haqlarını yüksəldiblər. Onların əsas arqumenti sektorda daha az mütəxəssisin qalması və keyfiyyətli xidmət göstərənlərin seçilməsidir.
Azərbaycan Plastik Cərrahlar Assosiasiyasının sədri Vaqif Qələndərli modern.az-a bildirib ki, qiymət artımı müşahidə edilmir, çünki əməliyyatlar da azalıb. Hazırda bu sahədə son vəziyyət necədir, gözlənti nədir?
Elşən Nəsibo
Plastik cərrah Elşən Nəsibov bildirib ki, qiymətlərdə artım yoxdur: “İndi bütün plastik cərrahları yoxlayırlar. Belə bir vaxtda kim risk edib qiyməti qaldıra bilər. Yoxlamalarla bağlı güclü axın yoxdur. Qiymətlər qalxsa, bir az da düşmə müşahidə olunar. Ona görə də qiymətlərin qalxması ilə bağlı deyilənlər real deyil”. Plastik cərrah Mircəfər Seyidin köməkçisi də qiymət qalxmasını təkzib edib: “Bizim əməliyyat xərclərində heç bir dəyişiklik yoxdur. Adətən pasiyentlər həkimin qəbulunda olur və danışıq əsasında qiymət təyin edilir. Bu, individualdır. Hər pasiyentə eyni qiymət deyilmir. Qiymət hansı nahiyyənin əməliyyatından, nə qədər çəkməsindən asılı olaraq dəyişir. Amma qiymətlərimizdə artım yoxdur, eyni qayda ilə davam edirik”. Estetik cərrah Sami Saminin köməkçisi bildirib ki, burun əməliyyatı 3 mindən başlayır, lakin dəqiq qiymət həkim müayinəsindən sonra deyilir.
Zülfüqar Yusifov
Bakı Ağrı Klinikasının baş həkimi Zülfüqar Yusifov mövzu ilə bağlı “Yeni Müsavat”a bildirib ki, qiymət artımına dair müəyyən sərbəstlik əvvəldən mövcud idi və klinikalar bu çərçivədə hansı xidmətlərə hansı tarifləri tətbiq edəcəklərini özləri müəyyənləşdirirdilər. Bu da o deməkdir ki, qiymətlərdə vahidlik yoxdur və müxtəlif klinikalarda fərqli təkliflər mövcuddur. Bazar iqtisadiyyatının qaydalarına əsasən, fərqli seçimlərin olması təbiidir. Xüsusilə nəzərə almaq lazımdır ki, bu xidmətlər adətən icbari tibbi sığorta paketlərinə daxil edilmir. Bu səbəbdən də burada tətbiq olunan qiymət siyasəti fərqli yanaşmalarla müşayiət oluna bilər.
Digər tərəfdən, nazirliyin də vurğuladığı kimi, estetik əməliyyatlara qərar verilməzdən əvvəl peşəkar konsultasiyaların alınması mühüm əhəmiyyət daşıyır. Əgər əməliyyatlar həqiqətən də sağlamlıq üçün zəruridirsə, və ya insanın psixoloji rahatlığını təmin etmək üçündürsə, əlbəttə ki, belə müdaxilələr zəruri hesab oluna bilər. Lakin müşahidələr göstərir ki, bir çox hallarda insanlar sırf vizual dəyişikliyə nail olmaq məqsədilə təkrar-təkrar əməliyyatlara üz tuturlar. Görünür, qiymət artımı və mövcud ajiotaj fonunda insanlar bu sahədə qərar qəbul edərkən daha düşünülmüş və məsuliyyətli davranmalı olacaqlar”.
