Azərbaycanı sevən, Bakıda dərs deyən türkiyəli müəllim iş və oturum izni ala bilmir – aidiyyəti qurumlara çağırış!
Sosial şəbəkələrdə yayılan və böyük marağa səbəb olan görüntülərdə İrəvanın baş meydanından Türk dünyasına bayram salamı göndərən gəncin kimliyi məlum olub. Musavat.com-un əldə etdiyi məlumata görə, bu gənc – Ogün Özdemir – hazırda Bakıdakı Türkiyə məktəblərindən birində riyaziyyat müəllimi kimi fəaliyyət göstərmək məqsədilə Azərbaycana gəlib.
O, bir neçə aydır ki, Azərbaycandadır, lakin iş və oturum icazəsi ala bilmir. Məsələ ondadır ki, Təhsil Nazirliyi ilə Dövlət Miqrasiya Xidməti arasında koordinasiya problemi yaranıb və Ogün bu iki qurum arasında sıxışıb qalıb. Bu səbəbdən deport edilməmək üçün hər üç aydan bir ölkəyə giriş-çıxış etməyə məcbur qalır.
Sonuncu dəfə ölkədən çıxış edərkən, fərqli və cəsarətli bir addım ataraq Ermənistana – İrəvana səfər edib. O, erməni viza sistemi vasitəsilə İrəvana daxil olmağa nail olub və orada çəkdiyi görüntülərlə İrəvanın baş meydanında Türk dünyasına, Azərbaycan adına salam göndərib. Bu video parçaları sosial şəbəkələrdə böyük səs-küyə səbəb olub, ictimaiyyət tərəfindən alqışla qarşılanıb.
Musavat.com bu məlumatları Ogün Özdemirin yaxınlarından və onu yaxından tanıyan şəxslərdən əldə edib. Məlum olub ki, o, yalnız müəllim deyil, həm də vətənpərvər bir blogerdir, Azərbaycanı sevir, burada qalmaq və fəaliyyət göstərmək istəyir. Onun arzusu budur ki, bu torpaqda nəfəs alsın, dərs keçsin, vətənə xidmət etsin.
Lakin bütün bu təəssübkeşliyə baxmayaraq, aidiyyəti qurumların gecikən və əlaqəsiz reaksiyası səbəbilə, Ogün Özdemir hələ də Azərbaycanda rəsmi olaraq çalışa bilmir.
Musavat.com olaraq Dövlət Miqrasiya Xidmətinin rəhbəri Vüsal Hüseynova, Təhsil Nazirliyinə və şəxsən Təhsil Naziri Emin Əmrullayevə çağırış edirik:
Bu vətənpərvər gəncə – Ogün Özdemirə – Azərbaycanda qalmaq, işləmək və fəaliyyət göstərmək imkanı yaradın!
O, Azərbaycan üçün çoxdan öz səmimi sevgisini sübut edib. İndi isə Azərbaycan dövləti bu sevgi və bağlılığa cavab verməlidir.
Ogün kimi qəhrəman, milliyyətçi, təbliğat gücünə sahib müəllimlərin bizə burada – Azərbaycanda ehtiyacı var!
R. A. ,
Musavat.com
Musavat.com Ogün Özdemirin Azərbaycandan Gürcüstana və oradan da Ermənistana keçməsinin və Ermənistanda çəkdiyi videoların cəmini ifadə edən videogörüntüləri oxuculara təqdim edir.
