Dünya əhalisinin təxminən yarısı 75 yaşına qədər ən az bir psixi pozuntu ilə üzləşəcək.
“Queensland” Universiteti və “Harvard” Tibb Məktəbi tərəfindən aparılan araşdırma depressiya, narahatlıq və asılılıq kimi pozuntuların qlobal miqyasda sürətlə artdığını ortaya qoyulub.
Tədqiqat Ümumdünya Səhiyyə Təşkilatının 29 ölkədə 150 min nəfərlə keçirdiyi 20 illik sorğu məlumatlarına əsaslanır. Nəticələr göstərir ki, bu pozuntular adətən uşaqlıq, yeniyetməlik və ya erkən yetkinlik dövründə başlayır. Kişilərdə orta yaş 19, qadınlarda isə 20-dir.
Araşdırma zamanı qadınlar arasında ən çox yayılan psixi pozuntular depressiya, travma sonrası stress pozuntusu və gündəlik həyata ciddi təsir edən fobiyalar olub. Kişilərdə isə alkoqol asılılığı, depressiya və spesifik fobiyalar ön plandadır.
Tədqiqatın əsas müəllifi professor Con Makqrat bildirib ki, “Ən geniş yayılmış pozuntular əsas depressiya və narahatlıqdır. Bu pozuntuların yayılma riski cinsiyyətə görə də fərqlənir”.
Professor Brett Emmerson isə vurğulayıb ki, “Əgər əhalinin yarısı psixi pozuntu yaşayacaqsa, bu, müalicə və erkən müdaxilə strategiyalarının yenidən nəzərdən keçirilməsini zəruri edir”.
Araşdırma psixi sağlamlıq məsələlərinin qlobal prioritetə çevrilməli olduğunu bir daha xatırladır. Erken diaqnoz və müvafiq dəstək mexanizmləri olmadan bu pozuntular geniş yayıla və ciddi sosial nəticələrə səbəb ola bilər./Sfera.az
