“Sonuncu amnistiya aktı 2021-ci ilin noyabr ayında olmuşdu. Zəfər amnistiyası 17 min 267 şəxsə şamil olunmuşdu. Onlardan bir çoxunun cəzası azaldıldı, bəziləri cəzadan və cinayət məsuliyyətindən azad edildi. Bu, Azərbaycan amnistiya tarixində ən böyüklərindən biri idi.
1995-ci ildən indiyə qədər 11 amnistiya aktı olub ki, 160 minə qədər şəxsə şamil edilib. Tarixən Azərbaycanda amnistiya aktı mühüm siyasi, milli, tarixi günlərlə bağlı olub.
2025-ci il Konstitusiya və Suverenlik İli elan olunub. Belə bir siyasi və hüquqi konteksdə yeni amnistiya aktının imzalanması real və əsaslandırılmış görünə bilər”.
Bunu Musavat.com-a açıqlamasında hüquq müdafiəçisi, Əfv Komissiyasının üzvü Əliməmməd Nuriyev deyib.
Onun sözlərinə görə, cəmiyyətin müəyyən təbəqəsi həmişə düşünür ki, mütəmadi olaraq amnistiya aktları olmalıdır:
“Lakin amnistiya aktlarının çox sürətlə baş verməsi əksər ölkələrin tarixində o qədər də uğurlu addım sayılmır. Müəyyən dövrlərdə şübhəsiz ki, amnistiya aktlarının verilməsi tamamilə yerinə düşür. Amnistiya aktının imzalanmasına bu gün ehtiyac var. Cəzaçəkmə müəssisələrində məhkum olunan şəxslərin sayı 25 minə yaxındır.
Şübhəsiz ki, az ağır cinayətlər törətmiş, eyni zamanda səmimi peşman olan, cəmiyyətə reinteqrasiya üçün hazır olan kontingent üçün amnistiya azadlığa çıxmaq yolunda yeni imkan deməkdir.
Məhkumlar arasında yaşlı, xəstə, qadınlar, azyaşlı uşağı olan analar var. Belə şəxslərin cəza çəkməsi bəzən müəyyən sosial ziyandır. Amnistiya humanizm aktıdır.
Prezidentimiz tərəfindən mütəmadi olaraq əfv sərəncamları verilir ki, bu da humanizmin təzahürüdür və çoxsaylı məhkumların öz ailələrinə qovuşmaq üçün şanısıdır. İstər amnistiya, istərsə də əfv həmişə balanslaşdırıcı və humanist rol oynayır. Düşünürəm ki, bu il amnistiya aktının qəbul edilməsi ehtimal olunandır.
Amnistiya təşəbbüsünü Prezident və millət vəkilləri irəli sürə bilərlər. Belə addımlara yalnız dəstək vermək olar. Cəzaçəkmə müəssisələrinin yükünün azaldılması çox vacib bir məsələdir”.
Əliməmməd Nuriyev xatırladıb ki, bir neçə ay bundan öncə amnistiya aktının qəbul edilməsi ilə bağlı deputatlar tərəfindən fikirlər səsləndirilib:
“Gələcəkdə qəbul edilərsə, bütün cinayətlərə şamil edilməyəcək. Ancaq sosial ədalət və humanizmə əsaslanan selektiv yanaşma olarsa, cəmiyyət tərəfindən anlayışla qarşılanacaq. Amnistiya ona gətirib çıxarmamalıdır ki, bütün cinayət etmiş şəxslər azadlığa çıxsın”.
