Türkiyədə fəaliyyət göstərən azərbaycanlı alim Aygün Attarın iki il öncə Ankarada Azərbaycan bayrağına qarşı hörmətsizlik etdiyi bildirilir.
Bu barədə Modern.az saytının rəhbəri Elşad Eyvazlı məlumat verib.
Onun sözlərinə görə, Türkiyədə keçirilən prezident seçkiləri ərəfəsində Azərbaycan Mətbuat Şurasının bir qrup üzvü, azərbaycanlı ictimai fəallar və jurnalistlər Ankarada olarkən xanım Attarın üçrəngli bayrağımıza sayğısız rəftarına şahidlik ediblər:
“Həmin vaxt Ankarada düzənlənən tədbirdə Aygün Attara kiçik ölçülü Azərbaycan bayraqları verilib ki, əlində saxlasın. Amma o, heç kimin gözləmədiyi halda həmin bayraqları yerə atıb. Professorun bu aşağılayıcı hərəkəti Azərbaycandan gedən jurnalistlərin heyrəti və etirazı ilə qarşılanıb. Tədbirə qatılan Azərbaycan Mətbuat Şurası İdarə Heyətinin üzvü, “Xüsusi Təyinatlıların Qaziləri, Şəhid ailələri və Veteranları” İctimai Birliyinin sədri, Vətən müharibəsi qazisi Bəhruz Məmmədzadə dərhal Aygün Attara etiraz əlaməti olaraq onun yerə atdığı üçrəngli bayraqları götürüb və tədbiri tərk edib”.
Bəhruz Məmmədzadə Musavat.com-a hadisə ilə bağlı danışıb:
“İki il bundan öncə ictimaiyyət və media nümayəndələri ilə birlikdə Ankaraya səfər etmişdik. Aygün xanımı tanımırdım, tədbirdə gördüm. Orada qazi kimi iştirak edirdim. Türkiyənin qaziləri, Azərbaycanın kursantları da tədbirdə idilər. Aygün xanımın yanında əyləşmişdim.
Tədbir başlayarkən iştirakçılara əldə tutulan Azərbaycan və Türkiyə bayraqları paylayırdılar. Aygün xanım birinci dəfə bayrağı götürmədi, ikinci dəfə götürəndə isə bayrağı stolun ayaq hissəsinə – yerə qoydu. Bu, mənim xoşuma gəlmədi və həmin bayrağı özüm götürdüm. Niyə buna etiraz etmədim? Tədbir pozulardı, oradakı kursantlarımıza pis nümunə olardım. Buna görə də əsəbi şəkildə çölə çıxdım. Bunu geniş ictimaiyyətə bildirmədim, azərbaycanlı qrup arasında danışdım”.
Məsələ ilə bağlı Aygün Attar sosial media hesabında açıqlama verib və deyilənləri təkzib edib:
“Bayrağımıza iki xoşagəlməz söz deyiləndə ölkəni lərzəyə gətirən mən bunu edə bilərdimmi?
2003-cü ildə Hollandiyada, 2014-cü ildə isə İsveçrədə vətən və bayrağa görə erməni diasporunun hücumundan Avropa Türk Federasiyasının üzvləri sayəsində çətinliklə xilas olan məni bayrağı yerə atan kimi göstərirlər. Mən həyatımı şanlı Azərbaycan bayrağının hər bir tribunada sərbəst dalğalanması uğrunda mübarizəyə həsr etmişəm.
Bayraq bizim namusumuzdur, ona hörmətsizlik edənə dərhal yeri göstərilməlidir. Məsələn, 35 ildən artıqdır ki, yaşadığım Türkiyədə sevimli Azərbaycanımın və Türkiyənin bayrağı haqqında pis danışan hər kəsə dərhal ən sərt şəkildə cavab verdim, məsələni ictimaiyyətin diqqətinə çatdırdım və lazımi tədbirlərin görülməsini tələb etdim”.
A. Attar haqqında yazılan bu məlumatın təkzib olunmasını, əks təqdirdə məhkəməyə müraciət edəcəyini qeyd edib.
