32 nəfərin zəhərləndiyi restoranın məsul şəxsi danışdı: “Yeməklər iki zala verilib, amma…”
“AQTA-nın nümayəndələri qidalardan nümunələr götürdülər və bildirdilər ki, hər şey qaydasındadır. Bu yeməklər restoranda iki zala verilib. Zalın birində ayrı-ayrı insanlarda zəhərlənmələr olub, digərində isə heç kim zərər görməyib”.
Bunu Musavat.com-a açıqlamasında ötən gün toyda 32 nəfərin zəhərlənməsi ilə bağlı danışan “Venesiya” şadlıq sarayının məsul şəxsi Habil Şükürov deyib.
“Bu yeməkləri eyni aşpazlar hazırlayıb. Nə oldu zalın birində zəhərlənmə oldu, digərində yox. Bizim özümüzə də maraqlıdır. Restoranın əməkdaşları da həmin yeməklərdən yeyiblər və heç birimizə heç nə olmayıb”.
Qeyd edək ki, dünən Xətai rayonunda yerləşən “Venesiya” şadlıq evində 32 nəfər zəhərlənib. Zəhərlənənlərin vəziyyəti ilə bağlı Kliniki Tibbi Mərkəzin (KTM) Mətbuat Xidmətinin rəhbəri Ruzbeh Məmməd Musavat.com- a bildirib ki, 19 aprel 2025-ci il 32 nəfər (23 qadın cinsli, 9 kişi cinsli) dəqiqləşdirilməmiş bakteriyal qida zəhərlənməsi diaqnozu ilə Kliniki Tibbi Mərkəzin Təcili və Təxirəsalınmaz Tibbi Yardım şöbəsinə yerləşdirilib.
“Dərhal xəstələrə tibbi xidmətlər göstərilib, mədələri yuyulub, infeksionist baxışı olub. Zəruri tibbi xidmətlərdən sonra onların hər biri evə buraxılıb”.
Baş verən hadisənin səbəbləri, həmçinin qida zəhərlənməsi olub-olmaması ilə bağlı AQTA mütəxəssisləri ilə müvafiq qurumların əməkdaşları tərəfindən araşdırmalara başlanılıb:
“Hadisənin baş verdiyi şadlıq evində istehlaka təqdim edilmiş və baxış zamanı mövcud olan bütün qida məhsullarından nümunələr götürülmüşdür. Bununla yanaşı, işçi masalardan və qida ilə təmasda olan səthlərdən yaxmalar götürülərək laborator müayinələrə təqdim olunub. Hazırda araşdırma davam etdirilir. Araşdırmaların nəticələri ilə bağlı əlavə məlumat veriləcək”, -AQTA-dan bildirilib.
