Müqəddəs Qurban bayramına sayılı günlər qalıb. Bu münasibətlə hər bir müsəlman gücü çatdığı qədər bayram tədarükünə başlayıb. Bəs islam dininə görə kimlər üçün qurban kəsmək vacib sayılır?
BiG.AZ-a açıqlama verən ilahiyyatçı Yaşar Qurbanov bildirib ki, qurban kəsmək təkidlə əmr olunmuş sünnədir və imkanı olan şəxslərin üzərinə düşür:
“Məsələn: evi, işi, maşını, gündəlik dolanışığı, ərzağı olan insanlar bu ibadəti yerinə yetirməlidir. Hənəfi məzhəbinə görə isə bu, imkanı olanlara hər il vacib hesab olunur. Qurban, bayram namazından sonra Allaha ən sevimli olan əməllərdən biridir.”
İlahiyyatçının sözlərinə görə, qurbanın əsas hikməti Allaha yaxınlıq və İbrahim peyğəmbərin yolunu davam etdirməkdir:
“İbrahim peyğəmbər öz oğlu İsmayıl üçün qurban olaraq qoyun kəsmişdir. Bu bayram eyni zamanda ailələr arasında mehribanlıq və kasıblara yardım etməklə də yadda qalır.”
Qurbanlıq heyvan üçün əsas şərtlər:
Sağlam, eyibsiz olmalıdır;
Gözü kor, ayağı axsaq, buynuzu dibindən sınıq, arıq və xəstə heyvanlar qurban olmaz;
Qurban heyvanı könüllü seçilməli, satıcı heç kəsi məcbur etməməlidir.
Qurban bayramı namazdan sonra başlayır və bayramın dördüncü günü məğrib namazına qədər qurban kəsilə bilər. Qurban ətinin üç hissəyə – ailəyə, yaxınlara və ehtiyac sahiblərinə paylanması müstəhəb sayılır.
