Ailə, Qadın və Uşaq Problemləri üzrə Dövlət Komitəsinin “Konstitusiya və Suverenlik İli” çərçivəsində milli mətbuatın 150 illik yubileyi münasibətilə jurnalistlər arasında martın 19-da elan etdiyi müsabiqənin vaxtı uzadılıb.
Dövlət Komitəsindən AZƏRTAC-a bildirilib ki, müsabiqə iyulun 4-dək davam edəcək.
Xatırladaq ki, müsabiqə iki nominasiya üzrə keçirilir:
• “Ailə mövzularının işıqlandırılması üzrə ən yaxşı yazı”
• “Uğurlu qadınlar haqqında ən yaxşı süjet”
Hər nominasiya üzrə 3 qalib müəyyən olunacaq. Qaliblər diplom və hədiyyələrlə, o cümlədən noutbuklarla mükafatlandırılacaqlar.
Müsabiqəyə televiziya, qəzet, jurnal, informasiya agentlikləri və onlayn mediada 2025-ci il 19 mart – 4 iyul tarixləri arasında yayımlanmış Azərbaycan və ya rus dillərində materiallar qəbul olunur. Yazıların həcmi 2 000-10 000 işarə arasında olmalı, “Arial” şriftinin 12 ölçüsü ilə MS Word sənədi şəklində (çap materialıdırsa, PDF formatında) təqdim edilməlidir. Video süjetlərin müddəti 1-5 dəqiqə arası olmalı və link formasında göndərilməlidir.
Yayımlanan yazı və ya video materialın linkini əlavə edərək, informasiya.aqupdk@family.gov.az ünvanına göndərmək xahiş olunur.
Materiallarla birlikdə aşağıdakı məlumatlar qeyd olunmalıdır:
• Namizədin adı və soyadı
• İşlədiyi media qurumu
• Əlaqə nömrəsi
Hər iştirakçı ən azı 3 material təqdim etməlidir. Müsabiqəyə təqdim edilən işlərdən 6 ən uğurlu material Müsabiqə Komitəsi tərəfindən qiymətləndiriləcək və nəticələr Milli Mətbuat Gününün 150 illiyinə həsr olunmuş tədbirdə elan ediləcək.
Qiymətləndirmə zamanı aşağıdakı meyarlara üstünlük veriləcək:
• Mövzunun dolğun əhatə olunması
• İfadə vasitələrinin zənginliyi
• Cəmiyyətə nümunəvi, pozitiv mesajların ötürülməsi
• Mövzuya fərqli yanaşma
• Beynəlxalq və yerli statistik məlumatların istifadəsi
Əlavə məlumat üçün əlaqə:
Telefon: (+99412) 498 80 93
Mobil: (+99451) 230 45 76
E-mail: informasiya.aqupdk@family.gov.az
