Zelenski İlham Əliyevə zəng etdi: Ukrayna Azərbaycana həmrəyliyini ifadə etdiYENİLƏNİB
İyulun 1-də Ukrayna Prezidenti Volodimir Zelenski Azərbaycan Respublikasının Prezidenti İlham Əliyevə zəng edib.
ARANTV.AZ xəbər verir ki, Volodimir Zelenski Rusiyanın Yekaterinburq şəhərində azərbaycanlılara qarşı hücumlarda həmvətənlilərimizin qətlə yetirilməsi ilə bağlı Ukrayna ictimaiyyətinin başsağlığını çatdırıb.
Dövlətimizin başçısı başsağlığına görə minnətdarlığını bildirib.
Prezident Volodimir Zelenski, həmçinin Ukrayna vətəndaşlarının İrandan təxliyəsi məsələsində Azərbaycanın dəstəyinə görə dövlətimizin başçısına təşəkkür edib.
Telefon söhbəti əsnasında ölkələrimiz arasında ikitərəfli münasibətlərin perspektivlərinə dair fikir mübadiləsi aparılıb, Hökumətlərarası Komissiyanın iclasının tezliklə Bakıda keçirilməsi ilə bağlı razılıq əldə olunub. Azərbaycanın və Ukraynanın ərazi bütövlüyünə və suverenliyinə bir daha qarşılıqlı dəstək ifadə edilib.
Ukrayna Prezidenti, eyni zamanda, Azərbaycanın ölkəsinə göstərdiyi humanitar yardımlara görə də minnətdarlığını bildirib.
***
Ukrayna Prezidenti Volodimir Zelenski Azərbaycan Prezidenti İlham Əliyevlə telefon danışığı aparıb.
ARANTV.AZ xəbər verir ki, bu barədə məlumatı Ukrayna lideri özünün rəsmi “Telegram” kanalında paylaşıb.
Zelenski bildirib ki, söhbət zamanı İlham Əliyevə Ukraynaya, Ukrayna xalqına və ölkənin ərazi bütövlüyünə verdiyi dəstəyə görə təşəkkürünü çatdırıb. O, həmçinin Rusiyanın Azərbaycan vətəndaşlarını təhqir etdiyi və Azərbaycan Respublikasına qarşı hədə-qorxu gəldiyi bir şəraitdə Ukraynanın açıq dəstəyini ifadə etdiyini xüsusi vurğulayıb.
Telefon danışığında Zelenski Rusiyanın Yekaterinburq şəhərində azərbaycanlı Səfərov qardaşlarının qətlə yetirilməsi ilə bağlı başsağlığı verib. Ukrayna lideri əmin olduğunu bildirib ki, bu hadisə ilə bağlı bütün faktlar araşdırılacaq və ədalət təmin olunacaq.
“Biz Prezident Əliyevlə eyni baxışa malikik: hər bir insanın həyatı və ləyaqəti qorunmalıdır”, – deyə Zelenski qeyd edib.
Tərəflər həmçinin iki ölkə arasında enerji və humanitar sahələrdə əməkdaşlığı, eləcə də iqtisadi münasibətləri müzakirə ediblər. Danışıq zamanı Azərbaycan və Ukrayna arasında İqtisadi Əməkdaşlıq üzrə Birgə Hökumətlərarası Komissiyanın iclasının keçirilməsi barədə razılıq əldə olunub. Zelenskinin sözlərinə görə, hər iki ölkənin hökumət üzvləri bu istiqamətdə işi daha da fəallaşdıracaqlar.
