Paytaxtın müxtəlif ərazilərində sahibsiz itlərlə bağlı şikayətlər bitmir. 2025-ci ilin ilk altı ayı ərzində ölkə üzrə 22 min 406 nəfərdə heyvan dişləməsi halları qeydə alınıb. Bu statistika problemin həcmini və ciddiliyini bir daha ortaya qoyur.
Bununla belə, şəhər küçələrində sahibsiz, nəzarətsiz və peyvəndsiz itlər hələ də narahatlıq yaradır. Onların xüsusilə axşam saatlarında qruplaşaraq insanların gediş-gəlişinə mane olması, həm də bəzi hallarda aqressiv davranışlar sərgiləməsi sakinlərdə qorxu hissi yaradır.
Məsələ ilə bağlı Sosial Tədqiqatlar Mərkəzinin icraçı direktoru Sahib Məmmədov Musavat.com-a danışıb:
“MDB ölkələrinin əksərində sahibsiz küçə itləri problemi aradan qaldırılıb. Bunun üçün 3 amil mütləqdir. Birincisi yerli hakimiyyət orqanlarının məsələyə doğru yanaşması, digəri qanunvericilikdə problemin həlli yolu, sonuncu və ən əsası cəmiyyətdir. Cəmiyyət bu məsələlərdə ən yaxın köməkçi olmalıdır”.
S.Məmmədov itlərin aqressivliyinin əsas səbəbini insanlarda görür:
“İtlərin aqressiv hərəkətləri bizim onları güllələməyimizdən, qovmağımızdan, ac, susuz saxlamağımızdan əmələ gəlir.
Gürcüstanda küçə itləri heç nədən çəkinmir, peyvəndli halda küçələrdədir. İnsanlar davamlı onları yedizdirir”.
Sahib Məmmədov küçə heyvanlarının hər birinə sığınacaqda yer ayıra bilməsək belə, peyvəndlənmənin mütləq və real olduğunu vurğulayıb:
“Kommunal xidmətlər peyvəndləmə əvəzinə heyvanları güllələyir. Həyatda qalanlar təkrar çoxalır. Bu onu göstərir ki, problemin həlli yolu deyil. COP zamanı da bu məsələ xarici media tərəfindən tənqid olundu. Məsələyə ciddi yanaşılmalıdır”.
S.Məmmədov təklif verib:
“Hər bir rayonda heç olmasa bir sığınacaq yaradılmalıdır, peyvənd və qısırlaşması isə mütləq hal olmalıdır. İnsanlar heyvanları öldürmək əvəzinə humanist yanaşıb onlara sevgi ilə qarşılıq versin.
Rəsmi qurumlar bu problem üçün uzun müddətdir ki, həll yolu tapmır. Nəticədə bütün yük cəmiyyətə düşür. Cəmiyyət və rəsmi qurumlar mütəşəkkil fəaliyyət göstərərək həyatı nisbətən az risklə davam etdirmək, şəhər küçələrini həm insanlar, həm də heyvanlar üçün daha təhlükəsiz məkana çevirmək yolunda addımlar atmalıdır”.
Mənzər Novruzlu,
Musavat.com
