“Bakı Metropoliteni” QSC-də yeni stansiyaların inşası və xətlərin ayrılması istiqamətində işlər mərhələli şəkildə davam etdirilir.
Report xəbər verir ki, bunu qurumun sədrinin müşaviri Emil Əhmədov jurnalistlərə açıqlamasında deyib.
Onun sözlərinə görə, artıq Türkiyənin “Yüksel Proje” şirkəti ilə müqavilə imzalanıb: “Müqavilə çərçivəsində iki əsas istiqamət nəzərdə tutulur. 10 stansiyadan 9-nun və tunellərin layihələndirilməsi, eləcə də Yaşıl və Qırmızı xətlərin ayrılmasının layihələndirilməsi. Xətlərin ayrılması zamanı “İçərişəhər” stansiyasında keçid kamerası, dönmə tuneli və yeraltı avtomobil dayanacağının layihələndirilməsi də planlaşdırılır. Hazırda stansiyaların yerlərinin dəqiqləşdirilməsi və rəsmiləşdirilməsi, həmçinin tunel traslarının hazırlanması işləri aparılır”.
E. Əhmədov qeyd edib ki, metro inşaatı sadəcə tikinti ilə məhdudlaşmır: “Bu prosesdə infrastruktur məsələləri də nəzərə alınmalı və Tikintinin Norma və Qaydalarının bütün müddəaları təmin olunmalıdır”.
O bildirib ki, xətlərin ayrılması üzrə işlər “Dərnəgül” deposundan başlanıb: “Burada tunellərdə 1 kilometrdən artıq dəmir yolunun çəkilməsi davam edir. Yollar dəmir-beton blok üzərində qurulur. Depo ərazisində qatarlara texniki xidmət və baxış üçün 7 sahənin birinci mərhələdə tam hazır vəziyyətə gətiriləcək”.
E. Əhmədovun sözlərinə görə, “28 May” stansiyası yaxınlığında qazma işlərinə start verilib: “Yaxın günlərdə 30 metrədək dərinliyə şaxtaların qazıntısı aparılacaq. “Dərnəgül” deposunun birinci mərhələsi başa çatdıqdan sonra bu şaxtalardan 200 metrədək tunel inşasına da başlanacaq. Eyni zamanda, “28 May” stansiyasının platformasını “Cəfər Cabbarlı” stansiyası ilə birləşdirəcək piyada tuneli üçün layihələndirmə işləri tamamlanıb və hazırlıq mərhələsinə keçilib”.
O əlavə edib ki, xətlərin ayrıldıqdan sonra dayanıqlı enerji təminatını verəcək iki elektrik yarımstansiyanın layihələndirilməsi də davam etdirilir: “İçərişəhər” stansiyasının arxasında yerləşəcək dönmə kamerası ilə bağlı isə geoloji kəşfiyyat və axtarış işləri aparılır. Layihələndirmə yekunlaşdıqdan sonra həm dönmə kamerası, həm tunel, həm də avtoparkinq barədə ətraflı məlumat ictimaiyyətə təqdim ediləcək”.
