“Putinin növbəti hədəfi Baltikyanı ölkələr yox, məhz Azərbaycandır” – Ölkəmiz yenə təhdid olundu

Kreml köpəkləri Azərbaycanı hədəfə götürüb – Moskvanın iç üzü ifşa olunur

Musavat.com xəbər verir ki, son günlər Rusiya siyasi dairələrində Azərbaycan əleyhinə açıq-aşkar informasiya hücumları başlanıb. Prezident Putinin Təhlükəsizlik Şurasının iclasından sonra Kreml mətbuatına və təbliğatçılarına “Azərbaycan istiqamətində kampaniya” aparmaq göstərişi verildiyi artıq gizlədilmir. Bu, Rusiyanın “dostluq siyasəti”nin mahiyyətini açıq şəkildə ortaya qoyur – kim xoşlarına gəlmirsə, dərhal hədəf elan edilir, işğalla, təhdidlə qorxudulur.

Məsələnin bariz nümunələrindən biri də Rusiyada “xarici agent” elan edilmiş politoloq Fyodor Kraşeninnikovun açıqlamasıdır. O, açıq şəkildə bildirir ki, Putinin növbəti hədəfi Baltikyanı ölkələr yox, məhz Azərbaycandır. Onun fikrincə, Rusiya üçün Azərbaycan asan qənimətdir, çünki burada Qərb institutları və NATO təhlükəsizlik çətiri yoxdur. Bu isə Kremlin quduz köpəklərinin düşüncə tərzini açıq-aşkar nümayiş etdirir – Azərbaycan dövlətini işğalla hədələmək, xalqı isə qorxutmaq.

Kraşeninnikov Azərbaycan ordusunu aşağılamağa da cəhd edir, guya 44 günlük müharibədə yalnız zəif Qarabağ ordusunu məğlub etdiyini deyir. Halbuki, Azərbaycan ordusu öz torpaqlarını işğaldan azad edərək tarix yazıb və bu gücün qarşısında Ermənistan ordusu da, Rusiya silahlı qüvvələri də dayana bilməz.

Əslində, bu cür bəyanatlar Moskvanın uzun illərdir dəyişməyən imperialist siyasətinin bir parçasıdır. Rusiya hər kəsi təhdid etməklə, qorxutmaqla, şantajla mövqeyini möhkəmlətmək istəyir. Bu gün Ukraynaya bomba yağdırır, sabah Azərbaycana qarşı informasiya müharibəsi aparır, ertəsi gün başqa bir ölkəni işğalla hədələyir. Bu siyasət Rusiyanı dünyada təklənmiş vəziyyətə salıb. Niyə indi Kreml bütün cəbhələrdə “izqoy”a çevrilib? Cavab sadədir: çünki Rusiya qorxu və ölüm üzərində siyasət qurur.

Azərbaycan isə öz mövqeyini açıq bəyan edir: biz Rusiyaya qarşı müharibə aparmırıq, düşmənçilik istəmirik. Bizim tələbimiz sadədir – vurulmuş təyyarəmizə görə ədalət istəyirik, günahkarların cəzalanmasını, kompensasiyanın ödənilməsini tələb edirik. Ədalət tələbi Kreml üçün dözülməz hala çevrilib, buna görə də informasiya hücumları, təxribatlar, səfirliyimizin bombalanması, SOCAR-ın obyektlərinə zərbələr, Ukraynada Azərbaycan iqtisadi varlığının sıradan çıxarılması kimi addımlara əl atılır.

Lakin bir həqiqəti Moskva yaxşı anlamalıdır: Azərbaycan xalqı öz dövlətinin və ordusunun yanındadır. Xarici müdaxiləyə qarşı bir nəfər kimi vuruşmağa hazırdır. Rusiya ikinci cəbhə açmaq istəyirsə, hər addımına görə adekvat cavabını da alacaq.

Rusiyanın dili – təhdid, əli – işğal, izi – qan və dağıntıdır. Azərbaycan isə öz torpağında müstəqil, qürurlu və güclüdür. Və heç bir Kreml köpəyi bu həqiqəti dəyişdirə bilməyəcək.

Musavat.com