Məhərrəmlik ayı bitdikdən sonra bir neçə sahədə olduğu kimi, qızıl bazarında da canlanma müşahidə olunur. Toy, nişan mərasimləri üçün hazırlığa başlayanlar qızıl dükanlarını gəzməyə başlayıblar.
Qızılın alışında isə artım davam etməkdədir. Hazırda ən çox tələbat olan türk qızılının (585 əyar) bir qramının qiyməti 135 manatdır. Bir neçə qızıl dükanında apardığımız müşahidələr göstərdi ki, qiymət hər nə qədər yüksək olsa da, alıcılar məcburən əllərini cibinə salmalı olurlar. Alıcılar bildirdilər ki, maddi baxımdan sıxıntı yaransa da, başqa yolu yoxdur, həyatda bir dəfə olan toy üçün hazırlıq görməlidirlər:
Alıcı: “Qiymətlər çox bahadır. Günü-gündən də bahalaşır. Amma nə edək, oktyabrda toyumuz var. Gəlinimizə nişanda ancaq üzük apara bildik. İndi isə həm toy üçün, həm də gündəlik üçün dəst almaq istəyirəm. Əvvəllər bir dəsti 2000-2500-ə almaq olurdu. Tanış satıcı olanda qiymətdə endirim də edirdilər. İndi isə çox bahadır. 5-6 min manatla istədiklərimizi alsaq, sevinərik”.
Alıcı: “Oğlum üçün nişan aparacağıq. İmkanım ancaq üzük və qolbaq almağa çatır. Eşitdik, ay sonuna qədər qiymətlər artacaq, dedik, tez gələk alaq”.
Satıcılarla da söhbətləşdik:
Satıcı: “Sizdən biraz əvvəl gəlib dedilər ki, maya dəyərini qaldıraq. İndi qızılın qramı 135 manatdır, amma belə getsə, ay sonuna qədər 150 manata qədər qalxacaq. Yəni elə eşitmişik. Müştəri var, indi toy mövsümüdür deyə baxan çoxdur. Alan da var, amma əvvəlki kimi birdəfəyə çox qızıl ala bilmirlər. Kimi ancaq sırğa alır, kimi azçəkili dəst. Toy üçün əsas italyan qızıllarına baxırlar, onun da bir qramının qiyməti 150-160 AZN-dir”.
Satıcı: “Maya dəyərini qaldırmağa məcbur olanda məhsulun qiyməti də qalxır. Məsələn, maya dəyəri 132 manatdırsa, biz satışı 135 manatdan etməliyik. Görünən odur ki, yeni gələn məhsulların qramını 150 manata satmağa məcbur olacağıq”.
Satıcılar həmçinin, bildirdilər ki, hər nə qədər italyan qızılına maraq böyük olsa da, tələbat əsasən rus və türk qızılınadır.
Yeri gəlmişkən, bu gün Azərbaycanda bütün əyarlı qızıl növlərində rekord bahalaşma qeydə alınıb.
Belə ki, hazırda 585 əyarlı qızıl 130-150 AZN, 750 əyarlı qızıl-170–200 AZN, 999.9 əyarlı qızıl (əsasən külçə və sikkələr) 210-220 AZN aralığında satılır.
Nigar HƏSƏNLİ,
Fotolar müəllifindir,
Musavat.com
