Hazırda məhkəmələrdə ən çox baxılan işlərdən biri də həyat yoldaşının adına götürülən kreditlərin boşandıqdan sonra ödənilməməsi ilə bağlıdır. Xüsusilə də keçmiş həyat yoldaşının adında əmlak yoxdursa, bu cür proseslərdə cavabdeh çətin durumda qalır.
Mövzu ilə bağlı BiG.AZ-a açıqlama verən vəkil Rəşad Əliyev bildirib ki, qanunvericiliyə görə nikah dövründə ərin və ya arvadın ailə ehtiyaclarının təmin olunması üçün üzərinə götürdüyü öhdəliklər ər-arvadın ümumi öhdəliyi sayılır və hər ikisi üçün vəzifələr yaradır.
Ailə Məcəlləsinin tələbinə əsasən, ər-arvadın əmlak bölgüsü ilə bağlı iddialarına baxılarkən ümumi öhdəliklər üzrə borclar onların mülkiyyət payına uyğun olaraq bölünür. Lakin bu bölgü kreditor qarşısında ər-arvadın birgə borclu olması faktını aradan qaldırmır.
Vəkil qeyd edib ki, Ali Məhkəmə Plenumunun 12 mart 2024-cü il tarixli qərarında da bu məsələlərin tənzimlənməsi qaydaları dəqiq göstərilib:
“Ər-arvaddan birinin bağladığı müqavilə ilə alınmış vəsait ailə ehtiyacları üçün istifadə olunubsa, hər iki tərəf kreditor qarşısında birgə borclu sayılır. Kredit müqaviləsi üzrə öhdəliklər nikah davam etdiyi müddətdə hər ikisini əhatə edir. Lakin nikah münasibətləri faktiki və ya rəsmi olaraq başa çatdıqdan sonra kredit ödənişlərinin bir hissəsini ər (və ya arvad) şəxsi vəsaiti hesabına ödəyibsə, məhkəmə həmin məbləğin paya uyğun hissəsinin qarşı tərəfdən tutulub ödənilməsinə qərar verə bilər”.
