Sabirabad rayonunda 14 yaşlı qızla 20 yaşlı oğlan nişanlanıb.Bu barədə polisə məlumat daxil olduqdan sonra nişanlanan yeniyetmə ilə gəncin atası Sabirabad Rayon Polis Şöbəsinə dəvət edilib. O, qızını nişanlamaq fikrinin olmadığını, qarşı tərəfin təkidi ilə “Həri” məclisinin olduğunu deyib.İctimai asayişi pozan şəxs barəsində İnzibati Xətalar Məcəlləsinin 510-cu (xırda xuliqanlıq) maddəsi ilə protokol tərtib edilib. Sabirabad Rayon Məhkəməsinin qərarı ilə S.Fərzalıyev 8 sutkalıq həbs edilib.
Mövzu ilə bağlı BiG.AZ-a danışan sosioloq İbrahim Cəfərov bildirib ki, cəmiyyətimizdə bəzən valideynlər ənənə və “el-obanın sözü” səbəbindən belə addımlar atırlar. Çox vaxt ailələr düşünür ki, qız uşağını “tez ərə vermək” onu təhlükələrdən qoruyar. Amma əksinə, bu, uşağın təhsilini yarımçıq qoymasına, psixoloji zərər almasına və gələcəkdə xoşbəxt olmamasına səbəb ola bilər:
“14 yaşlı qızın 20 yaşlı oğlanla nişanlanması xəbəri cəmiyyətdə ciddi narahatlıq doğurur. Burada əsas problem odur ki, qız hələ yetkinlik yaşına çatmayıb. Azərbaycan qanunlarına görə nikah yaşı 18-dir, yəni belə bir nişanlanma həm hüquqa, həm də uşağın sağlam inkişafına ziddir.
Cəmiyyətimizdə bəzən valideynlər ənənə və “el-obanın sözü” səbəbindən belə addımlar atırlar. Çox vaxt ailələr düşünür ki, qız uşağını “tez ərə vermək” onu təhlükələrdən qoruyar. Amma əksinə, bu, uşağın təhsilini yarımçıq qoymasına, psixoloji zərər almasına və gələcəkdə xoşbəxt olmamasına səbəb ola bilər.
Bu hadisədə atanın 8 gün həbs alması da göstərir ki, dövlət artıq belə məsələlərdə daha ciddi addımlar atır. Məqsəd yalnız valideyni cəzalandırmaq deyil, həm də cəmiyyətə mesaj verməkdir: “Uşaqları qorumaq hər kəsin borcudur.”
Burada əsas məsələ təkcə qanunla bağlı deyil, həm də düşüncə tərzidir. Erkən nikahların qarşısını almaq üçün kəndlərdə və rayonlarda maarifləndirmə işi aparılmalıdır. İnsanlara izah olunmalıdır ki qız uşağının təhsil alması ailə üçün daha böyük qürurdur. Erkən nikahlar çox vaxt uğursuzluqla nəticələnir.Uşağın sağlamlığı, psixologiyası və gələcəyi ən önəmli məsələdir.
Bu cür hadisələr hələ də cəmiyyətdə müəyyən qalıq ənənələrin güclü olduğunu göstərir. Amma eyni zamanda, dövlətin müdaxiləsi və medianın bu mövzunu işıqlandırması müsbət haldır. Bu yolla yavaş-yavaş ictimai şüur dəyişir”.
