“Ümumiyyətlə yaslarda camaata yemək vermək adət və ənənəsi dinimizdə yoxdur.”
Bunu BiG.AZ-a açıqlamasında ilahiyyatçı Yaşar Qurbanov bildirib.
O, qeyd edib ki, hələ peyğəmbərimizin zamanında Həzrəti Əlinin qardaşı İbn Əbu Talib şəhid olduqda peyğəmbərimiz məsləhət görüb ki, onun ailəsinə yardım edilsin, çünki ailəsi yasa qapılmışdı. Belə təmtəraqlı yemək verilməsi məsələsinə isə dinimizdə yer yoxdur:
“Bir çox müsəlman ölkəsində belə adətə rast gəlmirik. Bəzi ölkələrdə ölünün arxasınca yemək və ehsan vermək qaydası ümumiyyətlə yoxdur. Dinimizin tövsiyə etdiyi adət odur ki, ölənin adından yaxınlarına yardım edilir, ehtiyacı olanlara kömək göstərilir. Yaxşı olar ki, vəfat edən üçün ehsan vermək əvəzinə ehtiyacı olan tələbələrin təhsil haqqı ödənilsin, xəstənin dərmanı alınsın. Dinimiz deyir ki, vəfat edən üçün sədəqə verilsin. Onun dəfn olunması, kəfənlənməsi, cənazə namazının qılınması əsasdır. Ehsan və yemək vermək isə İslam dini ilə heç bir əlaqəsi olmayan, illərdir cəmiyyətimizdə qalmış adətlərdir.”
