İslamı gözdən salanların arxasında onlar dayanır
Rəsul Mirhəşimli deyir ki, bu təbliğatın arxasında dayanan beynəlxalq güclər ideoloji maraqları çərçivəsində hərəkət edirlər
Son dövrlərdə sosial şəbəkələrdə bəzi şəxslərin İslam dinini gözdən salan, dini dəyərləri aşağılayan və ictimai narazılıq yaradan videolar paylaşması geniş müzakirələrə səbəb olur. Sanki bu qrup şəxs İslamın mahiyyətinin məhz bu cür mənfi və aşağılayıcı xüsusiyyətlərlə səciyyələndiyini sübut etməyə çalışır.
Məsələn, hansısa pirdə kiminsə iməkləyərək yeri öpməsini, yaxud bir şəxsin avtobusda namaz qılmasını paylaşaraq inanclı insanları təhqir edirlər. Bu cür paylaşımlara xüsusilə Qurban və Ramazan aylarında, eləcə də Məhərrəm ayında tez-tez rast gəlinir. Bəziləri isə bildirir ki, bu materialların bir qismi real hadisələri əks etdirmir, məqsəd, sadəcə, dini dəyərləri gözdən salmaq və insanları Allah yolundan uzaqlaşdırmaqdır. Belə yanaşmalar cəmiyyətdə dini dəyərlərə hörmət, ifadə azadlığı və mənəvi məsuliyyət məsələləri ətrafında ciddi fikir ayrılıqları yaradır, eyni zamanda sosial medianın təsir gücü və onun mənəvi dəyərlərin qorunmasındakı rolu ilə bağlı mühüm suallar doğurur.
Rəsul Mirhəşimli
Araşdırmaçı jurnalist, dini məsələlər üzrə mütəxəssis Rəsul Mirhəşimli mövzu ilə bağlı “Yeni Müsavat”a deyib ki, bəzi insanlar və qruplar İslam dinini və müsəlmanları məqsədli şəkildə hədəfə alırlar: “Bu cür qruplar dinin əsl mahiyyətindən uzaq, təhrif olunmuş obrazlar formalaşdırmağa çalışırlar. Müxtəlif sosial platformalarda yayılan və İslamla heç bir əlaqəsi olmayan görüntüləri paylaşmaqla, guya bu dinin tərəfdarlarının gerilikçi, cəhalət içində yaşayan insanlar olduğunu göstərməyə cəhd edirlər. Halbuki bu görüntülərdəki biət, xurafat və cəhalət nümunələri ilə İslamın heç bir əlaqəsi yoxdur. Əksinə, düşünən, savadlı və imanlı hər bir müsəlman bu kimi halları rədd edir, belə davranışların dinin mahiyyətinə zidd olduğunu yaxşı bilir.
Bu təbliğatçıların dilində çox zaman bu ifadələr tez-tez səslənir: “Qurani-Kərimi dəfələrlə oxumuşam”. Lakin onların anlamadığı əsas məqam budur ki, Qurani-Kərim təkcə oxunmaq üçün nazil edilməyib. Quran bədii əsər deyil ki, oxuyub kənara qoyasan. Allah bu Kitabda insanlara təkcə oxumağı deyil, oxuduqlarını dərk edib, oradakı əmrlərə əməl etməyi, həyatda tətbiq etməyi bəyan edir. İslamın mahiyyəti ədalət, əxlaq, ədəb, mərhəmət, ibadət və elmdir. Haramdan çəkinmək, insanlara yaxşılıq etmək, ədalətli olmaq kimi prinsiplər bu dinin əsas sütunlarını təşkil edir.
Bu prinsipləri görməzdən gəlib, xurafat və cəhaləti İslam adı ilə təqdim edənlər əslində dinin düşmənlərinə xidmət edirlər. İslam dini insanı elmsizliyə yox, elmə, maarifə və savada dəvət edir. Peyğəmbərimiz Hz.Məhəmməd (s) “Elm öyrənmək hər bir müsəlmana vacibdir” buyuraraq, bilik və düşüncənin dində nə qədər mühüm yer tutduğunu göstərib. Xəstəlik zamanı həkimə müraciət etməyi də bu din təşviq edir, çünki səbəblərə sarılmaq da Allahın əmrlərindəndir. Şəfanı verən Allahdır, lakin həkimdən imtina edib, falçı və baxıcılardan mədəd ummaq İslamın qadağan etdiyi, lənətlədiyi, insanı azdıran ən pis əməllərdəndir”.
Mütəxəssis qeyd edir ki, tarixdə də buna bənzər yanlış düşüncə nümunələri çox olub: “Məkkədə Hz. Məhəmmədə (s) qarşı çıxan Əbucəhl öz dövrünün ən savadlı, nüfuzlu şəxslərindən idi. Amma o, öz savadını haqqı tanımaq üçün deyil, ona qarşı çıxmaq üçün istifadə etdi. Elə bu səbəbdən də tarixdə “Cəhlin atası” kimi qaldı. Bu fakt bizə göstərir ki, təkcə savadlı olmaq yetərli deyil, elm ədalət və imanla birləşməsə, insanı azdırar.
Müsəlmanları neqativ cəhətləri ilə göstərməyə çalışanların məqsədi aydındır. Bu məqsəd dinin nüfuzunu zəiflətmək, müsəlman cəmiyyətlərində özünə inamı sarsıtmaq, dini dəyərləri gözdən salmaq və nəticədə mənəvi boşluq yaratmaqdan ibarətdir. Bu təbliğatın arxasında dayanan beynəlxalq güclər isə ideoloji, siyasi və iqtisadi maraqları çərçivəsində hərəkət edirlər. Onlar İslamın birləşdirici, ədalətə çağıran və zülmə qarşı çıxan mahiyyətindən qorxurlar. Çünki ədalətli, savadlı və imanlı cəmiyyətlər asanlıqla idarə edilə bilmir.
İslam dini insanları azad düşünməyə, doğruya yönəlməyə, zülmə qarşı dayanmağa çağırır. Bu səbəbdən də onu gözdən salmaq istəyənlər əslində ədalətin, mənəviyyatın və insani dəyərlərin düşmənidir. Lakin unutmaq olmaz ki, Allahın nuru əbədidir. Nə qədər təbliğat aparılsa da, haqq həmişə batili üstələyəcək, İslamın mahiyyətini anlayan insanlar bu cəhdlərin arxasındakı niyyəti görəcək.
Ağlı başında olan müsəlman deyir ki, Kəbənin, Hz.Əlinin (ə) rəsmlərini tortun üzərinə yerləşdirib, sonra bu tortu kəsən dinə və Əhli-Beytə (ə) hörmətsizlik edir, yenə hədəfə götürülən müsəlmanlar olur. Hər kəsin hərəkətinə qiymət vermək fərdi olmalıdır. Bir fərdin səhv və yanlışlarını ümumiləşdirib, bütün inanclı insanlara aid etmək, ən yumşaq şəkildə desək, onların qəlbini qırmaqdır. “Kimsənin qəlbini qırma, bəlkə qırdığın qəlbdə Allah var”, buyurulub. Kimsənin haqqına girməyə çalışmayın, yoxsa bu vəbalın altından qalxa bilməzsiniz”.
Hazırladı: Afaq Mirayiq
