“İcra başçılarının qarşısında çox ciddi vəzifələr qoyulub” – Deputat DANIŞDI
“Cənab Prezidentin icra başçıları və səlahiyyətli nümayəndə təyinatları Gədəbəydən Naxçıvana qədər əhatə etdi. Yerdəyişmələrdə və təyinatlarda əsas məqsədin nə olduğu əslində Cənab Prezidentin təyin etdiyi şəxsləri qəbul edərkən söylədiyi fikirlərdə əksini tapır”.
Bu barədə Musavat.com-a açıqlamasında Milli Məclisin deputatı Elman Nəsirov bildirib.
Deputatın sözlərinə görə, əsas məqsəd odur ki, məmurlar öz vəzifələrini ləyaqətlə, ədalətlə icra etsinlər:
“Belə olanda əhali də onlardan razı olur, ölkənin rəhbərliyi də onlara daha böyük etimad göstərir. Əks halda cəza qaçılmaz olur. Cənab Prezident məmurlardan gözləntisinin nələrdən ibarət olduğunu Naxçıvana təyin etdiyi səlahiyyətli nümayəndə və yeni təyin etdiyi icra başçılarını qəbul edərkən açıq şəkildə ifadə etdi və göstərişlərini verdi.
İcra başçılarının qarşısında çox ciddi vəzifələr qoyulub. Həmin vəzifələri ləyaqətlə icra etməlidirlər. Etməyənlərin taleyinin necə olduğunu ölkə rəhbəri xatırlatdı”.
Deputat onu da xatırladıb ki, Prezidentin xüsusi səlahiyyətli nümayəndəsi institutunun özünü doğrulduğunu Prezident İlham Əliyev bir neçə dəfə qeyd edib:
“Ona görə də istisna deyil ki, bu idarəetmə institutunun bütün ölkə ərazisində tətbiqi reallaşsın. Amma bunun nə zaman olacağını söyləmək çətindir.
İcra hakimiyyətləri ilə bağlı məsələ Konstitusiyamızda öz əksini tapıb. Ona görə də yerli hakimiyyət funksiyasını məhz icra başçıları həyata keçirir”.
Etibar Seyidağa,
Musavat.com
