Paşinyan 3 sabiq prezidenti “məzara gömür” – revanşistlər əndişədə…
Ermənistanda baş nazir Nikol Paşinyanın Azərbaycan tərəfin hazırladığı sülh sazişinə adekvat davranması ölkə daxilində siyasi gərginliyi artırmaqdadır. Revanşist qüvvələr və onların xaricdəki havadarlarının yuxuları ərşə çəkilib. Çünki, görürlər ki, erməni cəmiyyəti də sülh istəyir, onlar artıq Azərbaycan və Türkiyə ilə düşmən münasibətlərdə olduqları, sərhədlər bağlı qaldığı sürəcdə ölkələrinin gələcək inkişafını görmürlər.
Qeyd edək ki, gələn ilin iyununda Ermənistanda parlament seçkiləri keçiriləcək. “Qarabağ klanı”nın əsas hədəfi bu seçkilərdə Paşinyanı iqtidardan devirməkdir. Amma bunun üçün revanşistlər öncəliklə erməni baş naziri məğlub lider kimi ictimaiyyətin gözündən salmalıdırlar. Buna isə nail ola bilmirlər. Paşinyanın “kapitulyant”, “xəyanətkar” obrazını gündəmdə saxlamaq cəhdləri heç nəticə vermir.
Əvəzində erməni baş nazir müharibədə özünün deyil, elə həmin revanşistlərin-keçmiş prezidentlər Levon Ter-Petrosyan, Robert Köçəryan və Serj Sərkisyanın məğlub olduğunu sübut etmək üçün ciddi səylər göstərir.
Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu Musavat.com-a açıqlamasında bildirib ki, Ermənistan baş nazirinin danışıqlar prosesi ilə bağlı sənədləri açıqlaması Ermənistan daxilində revanşistlərə zərbə vurulmasına hesablanıb:
“Seçkilər yaxınlaşdıqca kilsə və revanşist siyasi qüvvələr Rusiyanın göstərişi ilə hökuməti gözdən salmağa yönəlik addımlar atır və qara piar kampaniyası aparırlar. Ən güclü “arqumentləri” isə onların işğal etdiyi Azərbaycan ərazilərinin Paşinyan dönəmində Azərbaycan ordusu tərəfindən işğaldan azad edilməsidir. Revanşistlər Paşinyanı dövlətə xəyanətdə ittiham edərək, Azərbaycana məğlubiyyət məsələsini qabardır və bu faktor üzərindən ictimai dəstək qazanmağa çalışırlar. Təbii ki, Rusiyanın prosesdə pərdəarxası iştirakı ilə”.
Siyasi şərhçi əlavə edib ki, əlbəttə, sülh danışıqları ilə bağlı sənədlərin ictimailəşdirilməsi diplomatik etiket qaydalarına zidd olsa da, Azərbaycan bundan heç bir halda narahat ola bilməz: “Ona görə ki, danışqlar prosesində Azərbaycan milli maraqlardan çıxış edib ki, bu da eyni zamanda beynəlxalq hüququn tələblərinə cavab verən və ədaləti özündə ehtiva edən yanaşmadır. Əsas məqam isə revanşistlərin uzun illər ərzində danışıqlar prosesində heç bir üstünlüyə malik olmaması və Azərbaycanın prinsipial mövqeyinin həlledici olması ilə bağlıdır. Yəni, Paşinyan sənədləri yaymaqla cəmiyyətə göstərməyə çalışır ki, revanşist qüvvələr bu illər ərzində heç bir diplomatik üstünlük əldə edə bilməyiblər və bütün diplomatik platformalarda məğlubiyyətlə üzləşiblər. Paşinyan bununla da revanşistlərin son kartlarını da neytrallaşdırmağa çalışır”.
Əli Zülfüqaroğlu diqqətə çatdırıb ki, Paşinyanın arqumenti ona görə güclüdür ki, Ermənistanın rüsvayçı məğlubiyyətinin əsl səbəbkarlarının revanşistlər olması ilə bağlı fikirlər həqiqətə söykənir: “Çünki Ermənistan Azərbaycan torpaqlarını işğal etməklə və azərbaycanlılara qarşı soyqırım aktı törətməklə rüsvayçı məğlubiyyətlərinin əsasını qoymuşdular. Bu gün Ermənistanın Azərbaycan qarşısında diz çökməsinin səbəbi ilk növbədə Azərbaycan torpaqlarının işğalının müəllifləri olan və azərbaycanlılara qarşı ağır cinayətlər törədən revanşistlərdir. Azərbaycan bu qüvvələr başda olmaqla bütövlükdə Ermənistanı və onların dəstəkçilərini məğlub etdi. Paşinyan isə Ermənistanı revanşistlərin müəllifi olduğu dağıntılardan xilas etməyə və normal dövlətə çevirməyə çalışır. Onun ictimai dəstək qazanması isə revanşistləri narahat edir. Ona görə də Rusiyanın dəstəyi ilə Ermənistanın dövlət maraqlarını qurban verərək, öz hakimiyyətlərini formalaşdırmağa çalışırlar. Amma artıq gecdir, bölgədə Azərbaycanın yaratdığı yeni geosiyasi reallıqlar var. Paşinyan da bunu dərk edir və Azərbaycanla hesablaşaraq, Türkiyə ilə münasibətlərini də normallaşdırmaqla Avropa bazarlarına yol açmağa çalışır. Hesab edirəm ki, revanşistlər növbəti ildə də ağır məğlubiyyətə uğrayacaqlar”.
Cavanşir ABBASLI
Musavat.com
