Avtobus dayanacaqlarında xaotik vəziyyət, problemdən çıxış yolu
Bakıda bir çox ərazidə marşrut avtobuslarının dayanacaqları ilə bağlı xaotik vəziyyət mövcuddur. Redaksiyamıza daxil olan çoxsaylı şikayətlərdən aydın olur ki, dayanacaqların ərazisinin kiçik olması sərnişinlərə müəyyən çətinliklər yaşadır.
Belə ki, əgər dayanacaqda bir neçə avtobusun ilk yaxud son dayanacağı varsa, sərnişinlər digər marşrutlara minib-düşməkdə əziyyət çəkirlər. Dayanacaqda marşrutun gəlməsini gözləyən sərnişin meydançada bir neçə nəqliyyat vasitəsinin dayanması səbəbindən minməli olduğu avtobusu görmür, görsə belə, yaxınlaşıb minməyə çatdırmır. Digər tərəfdən, hətta uzunmüddətli dayanma olmasa da, sərnişinlər yolun hərəkət hissəsinə çıxmağa məcbur olurlar ki, onlara lazım olan avtobusları görə bilsinlər. Bunun nə qədər təhlükəli olduğunu anlamaq çətin deyil.
Bəs problemin həll yolu nədir? Mövzunu hüquqşünas Ərşad Hüseynovla müzakirə etdik. Ə. Hüseynov Musavat.com-a şərhində bildirdi ki, bütün marşrut avtobuslarının fəaliyyəti Nazirlər Kabinetinin 141 saylı “Avtomobil nəqliyyatı ilə baqaj daşınması” qərarı ilə tənzimlənir. O, diqqətə çatdırıb ki, şəhərdaxili, qəsəbədaxili marşrutlarda reysarası fasilə ola bilər, lakin bu zaman müəyyən qaydalara riayət etmək lazımdır:
“Fasilə elə təşkil olunmalıdır ki, avtobuslar harada dayanmasından asılı olmayaraq, həm yol hərəkəti qaydaları pozulmasın, həm də yol hərəkəti təhlükəsizliyinə problem yaranmasın. Amma qərarda reysarası fasilənin harada olması konkret qeyd olunmayıb. Bu gün Bakı şəhəri və Bakıətrafı ərazilərdə reysarası son dayanacağı təşkil etmək və bunun üçün böyük məkan tapmaq çox çətin məsələdir. Buna görə də marşrutları təşkil edənlər məsələyə diqqətlə yanaşmalıdırlar. Problemin həlli üçün avtobusların hərəkət qrafiki elə qurulmalıdır ki, reysarası fasilə yerlərində minimum sayda avtobus olsun. Hətta bunu elə təşkil etmək olar ki, cəmi bir avtobus fasilə etsin, digəri gələn kimi dayanacaqda dayanan çıxsın. Hər bir halda hərəkət qrafiki qurularkən hər bir nüans nəzərə alınmalıdır. Nəinki avtobusların, hətta minik avtomobillərinin də iki cərgədə dayanmasına icazə verilmir. Avtobusların dayanacaqdan kənarda sərnişin mindirib-düşürməsi qadağandır, əks halda 100 manat cərimə nəzərdə tutulur. Bəzi dayanacaq meydançalarından eyni vaxtda hətta 3 marşrut keçə bilər. Bu halda ard-arda dayanan zaman ikinci cərgədə avtobus saxlamaq məcburiyyəti yaranmır. Bu, sərnişinlərə avtobuslara rahat minməyə imkan verir”.
Ə.Hüseynov vurğulayıb ki, sərnişin avtobusa minmək üçün yolun hərəkət hissəsinə çıxmamalıdır: “Dünyanın əksər ölkələrində avtobus sürücülərinə təlim keçirlər ki, dayanacağa daxil olarkən səki daşına maksimum yan almalıdırlar ki, sərnişin avtobusa birbaşa səkidən minsin. İnfrastruktur elə qurulmalıdır ki, xaos olmasın, səliqə-sahman olsun, ən başlıcası isə təhlükəsizlik yüksək səviyyədə təmin olunsun”.
Nigar HƏSƏNLİ,
Musavat.com
