Moldovanın Xarici İşlər Nazirliyi ölkənin Müstəqil Dövlətlər Birliyindən (MDB) çıxışını nəzərdə tutan əsas sazişlərin denonsasiyasına start verildiyini açıqlayıb. Bununla da rəsmi Kişinyov təşkilatdan tam hüquqi ayrılıq prosesini rəsmən işə salıb. Xarici xəbər kanallarının yaydığı məlumata görə, Moldova MDB-yə üzvlüyün hüquqi əsasını təşkil edən sənədləri – birliyin yaradılma sazişini və nizamnaməsini mərhələli şəkildə ləğv etməyə başlayır. Proses tamamlandıqdan sonra ölkə hüquqi baxımdan MDB üzvü olmayacaq.
Bildirilir ki, söhbət təkcə texniki sənədlərdən deyil, Moldovanın MDB-də qalmasını mümkün edən əsas hüquqi bazanın aradan qaldırılmasından gedir. Kişinyov uzun müddətdir MDB institutlarında faktiki iştirak etmirdi və indi bu vəziyyət rəsmi-hüquqi müstəviyə keçirilir. Parlament mərhələsi başa çatdıqdan sonra müvafiq bildirişlərin MDB strukturlarına göndəriləcəyi gözlənilir.
Moldovanın faktiki ölü qurum sayılan MDB-ni tərk eləməsi xüsusən də Rusiyadan postsovet ölkələrinə son vaxtlar artan hədələr fonunda (Duqin, Solovyov və s.) digər üzvləri də həvəsləndirə bilərmi? Sıra kimdə? Azərbaycan bu haqda düşünməlidirmi?
Azad Vətən Partiyasının sədri Akif Nağı Musavat.com-a bildirib ki, MDB keçilmiş bir mərhələdir. Onun fikrincə, ona görə də orada qalıb-qalmamağın bir mənası yoxdur:
“Moldova da nəhayət, gözlənilən addımı atır. Bu ölkə Avrointeqrasiya yolunu tutub. Orta Asiya ölkələri də MDB ilə bağlı mövqeləri var. Faktiki olaraq Rusiyadan və Belarusdan başqa MDB-də qalmaq digər heç bir üzv ölkəyə xoş deyil. Moldovanın addımı getmək istəyənlərə stimul rolunu oynaya bilər. Amma Moldovadan sonra eyni addımı hansı ölkənin atacağını və nə zaman bunun baş verəcəyini dəqiq söyləmək çətindir”.
A.Nağı hesab edir ki, Azərbaycan da MDB-yə əslində cansız bir qurum kimi baxır:
“Azərbaycan üzv dövlətlərlə ikitərəfli münasibətlərə üstünlük verir. MDB-nin üzvü olan dövlətlərlə ikitərəfli çox yaxşı münasibətlər var. Rusiya MDB-nin tarixə qovuşacağı ilə Rusiya nə qədər tez barışsa bu, hər kəsin, o cümlədən Rusiyanın da faydasına olar. Bir qurumun ömrünü süni şəkildə uzatmaqda davam etməyin heç kimə faydası yoxdur”.
Etibar Seyidağa
Musavat.com
