Qurum hüquqi baxımdan yaşayır, amma siyasi və strateji baxımdan funksionallığını itirir
Müstəqil Dövlətlər Birliyinin (MDB) nizamnamə və digər orqanları yanında üzv dövlətlərin Daimi Səlahiyyətli Nümayəndələr Şurasının ilk iclası Minskdə keçirilib.
Musavat.com Rusiya mediasına istinadən xəbər verir ki, iclasda MDB-nin Baş katibi Sergey Lebedev iştirak edib. Azərbaycanı tədbirdə Belarusdakı səfirimiz Məhərrəm Əliyev təmsil edib.
Görüşün əsas məsələsi Türkmənistanın 2026-cı ildə Müstəqil Dövlətlər Birliyinə sədrliyinə dair konsepsiyanın və onun icrası üzrə tədbirlər planının təqdimatı olub.
Konsepsiyanı Daimi nümayəndələr Şurasının sədri, Türkmənistanın Belarusdakı fövqəladə və səlahiyyətli səfiri, Türkmənistanın MDB-nin nizamnamə və digər orqanları yanında daimi səlahiyyətli nümayəndəsi Nazarkulı Şakulıyev təqdim edib.
O vurğulayıb ki, sədrliyin prioritet istiqamətləri sülh, neytrallıq və etimaddır. Nazarkulı Şakulıyev qeyd edib ki, Türkmənistan beynəlxalq hüququn tanınmış norma və prinsiplərinə, BMT Nizamnaməsinə riayət olunması və onların qorunması istiqamətində beynəlxalq səylərin konsolidasiyasına xüsusi önəm verir. Onun sözlərinə görə, beynəlxalq hüququn qorunmasında MDB dövlətləri də mühüm rol oynamalıdırlar. Bu kontekstdə Türkmənistan Birlik üzrə tərəfdaşlara BMT-də beynəlxalq hüququn müdafiəsi, onun zəiflədilməsinin və dəyərdən salınmasının qarşısının alınması məqsədilə razılaşdırılmış diplomatik xəttin hazırlanmasını təklif etməyi planlaşdırır.
Türkmənistan hesab edir ki, dayanıqlı inkişaf yalnız etimad və təhlükəsizlik şəraitində mümkündür. Buna görə də sədrliyin əsas diqqəti etimad diplomatiyasına və regional əlaqələrin dayanıqlı sisteminin yaradılmasına yönəldiləcək.
O qeyd edib ki, Türkmənistan MDB ölkələri arasında mədəni, humanitar, elmi, təhsil və idman sahələrində ən geniş əməkdaşlığa sadiqdir və bunu xalqlar arasında etimadın, anlaşmanın və həmrəyliyin möhkəmləndirilməsinin əsası hesab edir.
Onun sözlərinə görə, Türkmənistanın 2026-cı ildə MDB-yə sədrliyi iştirakçı dövlətlər arasında birlik, praqmatizm və etimadın möhkəmləndirilməsi baxımından mühüm mərhələ olacaq. Təklif edilən təşəbbüslərin reallaşdırılması inteqrasiyanı dərinləşdirəcək, MDB-nin beynəlxalq nüfuzunu artıracaq və regionu sabitlik və yaradıcı tərəfdaşlıq məkanı kimi möhkəmləndirəcək.
İclas zamanı Daimi Nümayəndələr Şurasının cari il üçün iş planı da təsdiqlənib. Görüş iştirakçıları 17 aprel tarixində Kalininqradda keçirilməsi planlaşdırılan MDB Xarici İşlər Nazirləri Şurasının növbəti iclasının gündəliyinin layihəsini əsasən formalaşdırıblar.
MDB-yə üzv dövlətlərin Daimi Səlahiyyətli Nümayəndələr Şurasının növbəti iclasının fevralın 24-də Minskdə keçirilməsi planlaşdırılır.
Qeyd edək ki, Rusiya–Ukrayna müharibəsi üzv ölkələr arasında etimadı ciddi sarsıdıb. Təkilatda inteqrasiyanın formal olaraq qalır, qəbul edilən qərarların böyük hissəsi icra mexanizmlərindən belə məhrumdur. Azərbaycan əsas siyasi və iqtisadi prioritetlər MDB-dən kənar formatlarda formalaşır. MDB hüquqi baxımdan yaşayır, amma siyasi və strateji baxımdan funksionallığını itirir. Bu, “səssiz dağılma” və ya “dondurulmuş qurum” modelidir. Bu baxımdan M.Əliyevin tədbirdə çıxış etməməsi təəccüblü deyil…
