Qalmaqal bitdi: Səidə ilə Rəqsanə barışdı
Teleaparıcı Səidə Bəkirqızı ilə müğənni Rəqsanə İsmayılova arasında bir neçə gün davam edən qalmaqal sona çatıb.
Musavat.com xəbər verir ki, tərəflər qarşılıqlı açıqlamalardan sonra barışıq əldə ediblər.
Belə ki, əvvəlcə müğənni sosial şəbəkələrdə üzrxahlıq videosu paylaşaraq jurnalistdən üzr istəyib. O, verdiyi açıqlamalara görə peşman olduğunu bildirib, hirsli olduğu üçün tələskənliyə yol verdiyini etiraf edib.
Aparıcı Səidə Bəkirqızı isə Tarix Əliyevin aparıcı olduğu verilişə telefon bağlantısı ilə qoşularaq barışıq elan edib. O, verilişdə qonaq olan Aysun İsmayılova və Rəqsanə İsmayılova haqqında müsbət fikirlər səsləndirib, Aysunu çox bəyəndiyini vurğulayıb.
Səidə Bəkirqızı daha sonra Rəqsanə İsmayılova ilə illər əvvəl yaxşı ünsiyyətinin olduğunu qeyd edib və bunları deyib:
“Mən demişəm ki, Rəqsanə kimi xanımları evinin xanımı etmək hər kişinin işi deyil. Eyni zamanda bizim kimi aparıcıları evinin xanımı etmək də hər kişinin işi deyil. Çünki biz evdə oturan qadın deyilik, ictimaiyyətə açıq insanlarıq. O cür cəsarətli fotosessiyanın arxasında Fazil müəllim dayanmışdı deyə, Rəqsanə bunu etdi. Mən Fazil müəllimi aşağılamamışam, elə tərbiyə almamışam.
Mənim həyat yoldaşım da tanınmış aparıcının əri olmağın çətinliyini yaşayır. O, hər dəfə saytlara baxır ki, görsün indi Səidə haqqında nə yazıblar. Bu baxımdan mənim həyat yoldaşım olmaq da asan deyil. Mən çox istəyirdim ki, Rəqsanə xanım düşüncəsi dayaz olan işçini yanında saxlamaqdansa, düşüncəli birini saxlasın. Təhqir deyə-deyə sizi provokasiyaya çəkdi. Halbuki mənim çıxışımda təhqir yox idi. Bu məsələ araşdırılmadı”.
Qeyd edək ki, teleaparıcının Rəqsanə İsmayılovanın açıq-saçıq geyimdə fotosessiya etdirməsini tənqid etməsi müğənninin sərt reaksiyasına səbəb olmuşdu. Rəqsanə İsmayılova sosial şəbəkədə canlı yayım açaraq jurnalistə kəskin cavab verib. Həmin yayım zamanı müğənni Səidə Bəkirqızının valideynlərini, xüsusilə də dünyasını dəyişmiş atasını təhqir edib, jurnalistin şəxsi həyatı ilə bağlı etikadan kənar və ağır ifadələr səsləndirib.
Bu çıxışdan sonra tərəflər arasındakı münasibətlər daha da gərginləşib və məsələ şəxsi çəkişmə çərçivəsindən çıxaraq hüquqi müstəviyə keçib.
Jurnalist Səidə Bəkirqızı baş verənləri şərəf və ləyaqətinin alçaldılması kimi qiymətləndirərək hüquq-mühafizə orqanlarına rəsmi müraciət edəcəyini demişdi.
Şahanə Rəhimli
Musavat.com
