“ASAN xidmət” ümummilli liderin 100 iliyinə həsr olunmuş konsert proqramı təşkil edib – FOTO/VİDEO
Xətai rayonunda ümummilli lider Heydər Əliyevin 100 illik yubileyi və Milli Qurtuluş Günü münasibətilə möhtəşəm konsert proqramı və atəşfəşanlıq təşkil olunub.
Konsert proqramı Heydər Əliyev adına istirahət parkının amfiteatr səhnəsində Xətai rayon İcra Hakimiyyəti, Vətəndaşlara xidmət və Sosial İnnovasiyalar üzrə Dövlət Agentliyinin təşkilatçılığı, ASAN radionun dəstəyi ilə keçirilib.
Öncə xalqımızın ümummilli lideri Heydər Əliyevin parkda ucaldılan abidəsi ziyarət edilib, önünə gül dəstəsi qoyulub.
Vətəndaşlara xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Xətai rayon İcra Hakimiyyətinin başçısı Rafiq Quluyev, YAP Xətai rayon təşkilatının sədri Vüqar Rəhimzadə, Dövlət Təhlükəsizlik Xidməti Xətai rayon İdarəsinin rəisi Hümbət Əliyev, rayon prokuroru Sərdar İmanov, şəhid atası, Xalq artisti Əli Nur, Vətəndaşlara xidmət və Sosial İnnovasiyalar üzrə Dövlət Agentliyinin rəhbər şəxsləri, rayonun idarə, müəssisə və təşkilat rəhbərləri, şəhid ailələri, ASAN könüllüləri, qazilər, Milli Müdafiə Universitetinin kursantları, ziyalılar və sakinlər tədbirə qatılıblar.
Əvvəlcə Azərbaycan Respublikasının Dövlət himni səsləndirilib, ərazi bütövlüyümüz uğrunda həlak olmuş şəhidlərimizin əziz xatirəsi bir dəqiqəlik sükutla yad edilib.
Sonra ulu öndər Heydər Əliyevin ictimai-siyasi və dövlətçilik fəaliyyətinə dair videoçarx nümayiş etdirilib.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Xətai Rayon İcra Hakimiyyətinin başçısı Rafiq Quluyev çıxış ediblər.
Çıxışlarda Milli Qurtuluş Gününün tarixi əhəmiyyəti haqqında danışılıb.
Qeyd olunub ki, milli qurtuluş ideologiyasının təntənəsi hər zaman müstəqil respublikamızın davamlı inkişafında özünü büruzə verib, dünyada Azərbaycanın nüfuzunun daha artırılmasında əsas faktora çevrilib. Ulu öndər Heydər Əliyevin hakimiyyətə qayıdışından sonra ölkədə baş vermiş sosial-iqtisadi və siyasi inkişaf dövlətimizin möhkəmlənməsində, sivil dünyaya sıx inteqrasiya prosesinə qoşulmasında və xalqımızın strateji mənafelərini təmin edən modern cəmiyyətin qurulmasında həlledici rol oynadı. Beləliklə, bu mühüm tarixi gün xalqımızın yaddaşına Milli Qurtuluş Günü kimi həkk oldu və 1997-ci ildən etibarən parlamentin qərarı ilə rəsmi bayram kimi qeyd edilməyə başladı.
Əgər müstəqilliyi qazanmaq ilkin şərt idisə, ikinci vacib məsələ onu qoruyub inkişaf etdirmək idi. Bu, ümummilli liderin iradəsi sayəsində reallığa çevrildi. Heydər Əliyev milli dövlətçiliyimizin konsepsiyasını yaratdı.
Tədbirdə vurğulanıb ki, ötən illər ərzində Azərbaycan böyük inkişaf yolu keçib. Ölkəmizin inkişaf strategiyası məhz ulu öndər Heydər Əliyev tərəfindən müəyyənləşdirilib. Bugünkü Azərbaycan ulu öndərin görmək istədiyi Azərbaycandır.
Konsert proqramı tanınmış mədəniyyət və incəsənət xadimlərinin vətənpərvərlik mövzularındakı ifaları ilə davam etdirilib.
Sonda isə atəşfəşanlıq olub.
