Su-bataqlıq əraziləri suyun ətraf mühitə, əlaqəli bitki və heyvanlar aləminə nəzarət edən əsas amilidir. Bataqlıq ərazilərin geniş tərifinə həm şirin su, həm də dəniz və sahil ekosistemləri, məsələn, bütün göllər və çaylar, yeraltı su qatları, yaş çəmənliklər, torflar, oazislər, estuarlar, deltalar, manqrovlar və digər sahilyanı ərazilər, mərcan rifləri, habelə balıq gölməçələri, düyü çəltikləri, su anbarları və şoranlıqlar kimi insan tərəfindən yaradılmış bütün sahələr daxildir.
AZƏRTAC xəbər verir ki, bu fikirlər BMT-nin hər il fevralın 2-də qeyd edilən Ümumdünya Su-Bataqlıq Əraziləri Günü münasibətilə dərc etdirdiyi hesabatda yer alıb.
Hesabatda qeyd olunub ki, bu ekosistemlərin daxili dəyəri, onların ekoloji, iqlim, sosial, iqtisadi, elmi, təhsil, mədəni, rekreasiya və estetik töhfələri, həmçinin davamlı inkişafa və insan həyatında əhəmiyyətli təsiri nəzərə alınmalı, bu baxımdan onların insanların rifahı və təbiət üçün çox vacib olduğu vurğulanmalıdır.
“Bununla belə, onlar Yerin quru səthinin yalnız təxminən 6 faizini, bataqlıq ərazilərdə yaşayan və ya çoxalan bütün bitki və heyvan növlərinin 40 faizini əhatə edir. Su-bataqlıq ərazilərin biomüxtəlifliyi sağlamlığımız, qida təminatımız, turizm və iş yerləri üçün vacibdir. Bu ərazilər insanlar, digər ekosistemlər və iqlimimiz üçün həyati əhəmiyyət kəsb edir, daşqınlara nəzarət və suyun təmizlənməsi daxil olmaqla əsas ekosistem xidmətləri təmin edir. Dünyada bir milyarddan çox insanın dolanışığı su-bataqlıq ərazilərdən asılıdır. Bu, Yer kürəsində təxminən hər səkkiz nəfərdən biri deməkdir.
Su-bataqlıq ərazilərinin əhəmiyyəti və onların biomüxtəlifliyinin qorunması haqqında məlumatlılığı artırmaq məqsədilə hər il fevralın 2-də Ümumdünya Su-Bataqlıq Əraziləri Günü qeyd olunur. Bu, 1971-ci ildə su-bataqlıq əraziləri haqqında Ramsar Konvensiyasının qəbul edildiyi tarixdir. Günün məqsədi bütün dünyada bataqlıq ərazilərinin qorunması və davamlı istifadəsinin təşviq edilməsidir.
Ümumdünya Su-Bataqlıq Əraziləri Günü ilk dəfə 1997-ci ildə qeyd olunub. 2021-ci il avqustun 30-da BMT Baş Assambleyası fevralın 2-ni Ümumdünya Su-Bataqlıq Əraziləri Günü elan edən qətnamə qəbul edib.
