Ekspertlər deyir ki, dəmir yolu açılsa, Bakıdan İstanbula, oradan Avropaya qədər qatar səfərlərinin təşkili mümkündür; ADY-dən açıqlama: “Quru sərhədlər bağlıdır və…”
Bakı-Tiflis-Bakı dəmir yolu marşrutunun istifadəyə verilməsi üçün biletlərin hazırlanması prosesinə başlanılıb. Bu barədə Minval.az-a Gürcüstan Dəmir Yolu SC-dəki mənbə məlumat verib. Departamentdən bildirilib ki, Azərbaycan və Gürcüstan arasında dəmir yolu xəttinin mayın ortalarına kimi istifadəyə verilməsi planlaşdırılır. Tərəflər hələlik qatarın buraxılış tarixini dəqiqləşdirməyiblər, lakin əmindirlər ki, ilk reys mayın 15-dən əvvəl baş tutmalıdır.
Əvvəllər bildirilib ki, tərəflər texniki detallar üzrə razılığa gəlməkdə davam edir, həmçinin dəmir yolu şirkətləri ilə müvafiq dövlət qurumları arasında danışıqlar aparır.
“Gürcüstan və Azərbaycan arasında dəmir yolu ilə sərnişin daşımalarının bərpası təxirə salınıb”. Bu barədə məlumatı ötən həftəsonu “Gürcüstan Dəmir Yolları” yayıb. “Bakı və Tiflis arasında dəmir yolu ilə sərnişin daşınmasının bərpa edilməsinə dair işlər davam etdirilir, lakin reyslərin bərpa edilməsinin dəqiq tarixi daha sonra açıqlanacaq”, – deyə məlumatda qeyd olunub.
“Türkiyə Bakı-Tiflis-Qars dəmir yolu xəttinin tam gücü ilə fəaliyyətə başlamasını istəyir”. Bunu Türkiyə Prezidenti Rəcəb Tayyib Ərdoğan Antalya Forumu çərçivəsində Gürcüstanın baş naziri İrakli Kobaxidze ilə görüşündə deyib. Türkiyə lideri Gürcüstanla dostluq və əməkdaşlığın hər sahədə inkişaf edəcəyinə inamını ifadə edib.
Bakı ilə Tiflis arasında sərnişindaşıma 2020-ci ilin mart ayında COVİD-19 pandemiyası ilə əlaqədar dayandırılıb və hələ də bərpa olunmayıb. Azərbaycanın qonşu dövlətlərlə, o cümlədən Gürcüstanla quru sərhədləri də bağlı olaraq qalır. Son olaraq ölkədə iyulun 1-dək xüsusi karantin rejimi uzadılıb. Hələlik Azərbaycandan yalnız təyyarə ilə çıxa, müstəsna hallarda isə avtomobil nəqliyyatından istifadə etmək mümkündür.
Natiq Cəfərli
İqtisadçı Natiq Cəfərli mövzu ilə bağlı “Yeni Müsavat”a fikrini bölüşüb: “Görünən odur ki, Bakı-Tiflis-Bakı qatar yolunun açılmasında daha çox Gürcüstan maraqlıdır. Bu da təbiidir, Gürcüstanın turizm potensialının artırılması üçün edilir, Gürcüstanda yaşayan yüz minlərlə soydaşımız var. Onların qohum-əqrəbalarının əlaqələrinin intensivləşməsi üçün Gürcüstan buna daha çox çalışır. Çünki quru sərhədlər açıq olan zaman Azərbaycan vətəndaşları Gürcüstanda çox vəsait xərcləyirdilər. Gürcüstan tərəfdən ard-arda açıqlamalar verilsə də, Azərbaycan tərəfi nə təsdiq, nə də təkziblə edir. Çox ümid edirik ki, məlumatlar Azərbaycan tərəfindən də təsdiqlənəcək, nəhayət ki, bu yol açılacaq. Azərbaycan həm sərnişin, həm də yükdaşımalarda bir logistik mərkəzə də çevrilmək istəyir. Bunun üçün böyük potensial var. Bakı-Tiflis-Qars dəmir yoluna hökumət yüz milyonlarla vəsait qoyub tikib. O yola qoyulan vəsaitin geri dönüşündə sərnişindaşımanın da ciddi payı ola bilər. Bakı-Tiflis-Qars dəmir yolu açılsa, Bakıdan İstanbula, oradan Avropaya qədər qatar səfərlərinin təşkili mümkündür”.
Eldəniz Cəfərov
Nəqliyyat məsələləri üzrə ekspert Eldəniz Cəfərov da mövzu ilə bağlı fikirlərini “Yeni Müsavat”a açıqlayıb: “Bilet məsələsi dəqiqdir. Çünki bileti Azərbaycan tərəf hazırlayır. Bakı-Tiflis-Bakı qatarları Azərbaycana məxsusdur. Biletləri hazırlayırsa, hansı qatarın gedəcəyi, saatını bizim dəmir yolu müəyyən edir. Gürcüstan tərəf artıq təxirə salındığını açıqlayıb. Azərbaycan tərəfi hələ ki açıqlama verməyib. Yaxşı olardı ki, ya təkzib olunsun, ya da açıqlama olsun. Ümumiyyətlə isə Bakı-Tiflis-Bakı qatarı bərpa olunmalıdır. Bu marşrut işləməlidir. Bizim vətəndaşlar Gürcüstana, Gürcüstan vətəndaşları da Azərbaycana gəlməlidir. Turistik mübadilə olmalıdır. Azərbaycan tərəfi Bakı-Tiflis-Bakı qatarının yenidən fəaliyyətə başlaması ilə bağlı hər hansı bir açıqlama verməyib. Əsasən Gürcüstan tərəfi bununla bağlı məlumat yayır. Qatarın təxirə düşməsinin əsas səbəbi kimi karantin rejiminin uzadılması ola bilər. Səbəb budur. Lakin düşünürəm ki, hava yolunun açıq olmasını nəzərə alaraq baxmayaraq ki, karantin rejimidir və quru sərhədlər bağlıdır, qatar yolunun açılması mümkün ola bilər. Quru sərhədlər hətta bağlı olduğu müddətdə belə necə ki qatarla yükdaşıma həyata keçirilir, eyni zamanda qatarla sərnişindaşımanın həyata keçirilməsi də yaxşı olardı. Həmçinin marşrutun yenidən bərpa olunmasının və ya təxirə salınmasının başqa səbəbləri də ola bilər. Burada hansı qatarların hərəkət etməsi, hansı saatda yola düşməsi, biletlərin hansı qiymətdə olması məsələsi də işin ləngiməsinə səbəb ola bilər”.
Məsələ ilə bağlı “Azərbaycan Dəmir Yolları” QSC-nin də mövqeyini öyrəndik. Qurumun mətbuat xidmətindən “Yeni Müsavat”a belə cavab verilib: “Koronavirus infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Nazirlər Kabinetinin 2020-ci il 12 sentyabr tarixli 336 nömrəli Qərarı ilə Azərbaycan Respublikasının ərazisində xüsusi karantin rejimi tətbiq olunub, hazırda da davam edir və ölkənin quru sərhədləri bağlıdır. Bununla əlaqədar qatarlarla beynəlxalq sərnişindaşıma fəaliyyəti 2020-ci ildən etibarən dayandırılıb”.
