ABU-nun sabiq rektoru Bakıya istintaqa çağırılıb – onun bir neçə il əvvəl Rusiya vətəndaşlığı aldığı deyilir – Zakir Qaralov onu hələ illər öncə…
Azərbaycan Beynəlxalq Universitetinin (ABU) keçmiş rektoru Elşad Abdullayev Baş Prokurorluğun İstintaq İdarəsinə çağırılıb. Bu barədə Baş Prokurorluq İTV vasitəsilə müraciət ünvanlayıb. Qeyd olunub ki, Abdullayev Elşad İslam oğlu şəxsiyyətini təsdiq edən sənədlə birlikdə 5 may 2025-ci il tarixdə, saat 10:00-da Bakı şəhəri, Binəqədi rayonu, Dərnəgül yaşayış sahəsi, 21-ci Dağlıq küçəsi, 3105-ci məhəllə ünvanında yerləşən Azərbaycan Baş Prokurorluğunun İstintaq idarəsinin inzibati binasına gəlməlidir.
Bildirilib ki, 1 sentyabr 2024-cü il tarixdə Abdullayev Elşad İslam oğluna Cinayət Məcəlləsinin 137.5.1, 137.5.2, 137.5.3, 213.2.2, 308.2, 311.3.1, 311.3.2, 311.3.3 və 29, 312.2-ci maddələri ilə yenidən ittiham elan edilməsi haqqında qərar qəbul edilmiş, lakin o, Azərbaycan Respublikası hüdudlarından kənarda olduğundan ona ittiham elan etmək mümkün olmayıb.
Elşad Abdullayev 1954-cü il sentyabrın 25-də Kürdəmirdə anadan olub. 1974-cü ildə ADU-nun hüquq fakültəsini fərqlənmə ilə bitirib. 1985-ci ildə Moskvada namizədlik dissertasiyasını, 2000-ci ildə isə doktorluq müdafiə edib.
4 dekabr 2008-ci ildə Rusiya Hüquq Elmləri Akademiyasının həqiqi üzvü, akademiki seçilib. 2009-cu ildə Prezidenti Yanında Ali Attestasiya Komissiyasının Hüquq Ekspert Şurasının sədri seçilib.
Elşad Abdullayev 25 sentyabr 2012-ci il tarixdən etibarən MTN -də işləyən qaynı polkovnik Mustafa Əhmədovun tapşırığına uyğun olaraq Azərbaycanın müxtəlif vəzifəli şəxsləri ilə görüşlərində gizli yolla çəkilmiş videoları internetdə yayımlamağa başlayıb. Həmin videoların bəziləri üzrə cinayət işləri başlanıb, müxtəlif şəxslər həbs edilib və ya tutduğu vəzifədən azad edilib.
28 sentyabr 2012-ci ildə videoçəkilişlərdə əks olunan məlumatlar Bakı Şəhər Prokurorluğunda araşdırıldı. Qeyd edilən audio və videoyazılarda dələduzluğun, yəni etibardan sui-istifadə etmə yolu ilə özgə əmlakını ələ keçirmənin əlamətləri olduğundan həmin məlumatların hərtərəfli, tam və obyektiv araşdırılmasını təmin etmək məqsədilə çoxsaylı təxirəsalınmaz istintaq və istintaq-əməliyyat tədbirlərinin keçirilməsinin zəruriliyini nəzərə alaraq toplanmış material üzrə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə cinayət işi başlandı.
2010-cu ildə fəaliyyəti dayandırılmış ABU-nun nəhəng bina kompleksi 15 ildir istifadəsiz qalıb. ABU-nun lisenziyası ləğv edilən kimi rektoru Fransaya qaçaraq, oradan keçmiş deputat Gülər Əhmədovanın, iş adamı Arzu Kazımovun həbsinə səbəb olan videolar yaydı. Bununla yanaşı, E.Abdullayevin özünün də vətənə qayıdışı mümkün olmadı, özü barəsində də cinayət işi davam edir. Ölkəyə dönəcəyi halda istintaqa cəlb olunacaq. Eks-rektorun qeyri-qanuni tələbə qəbulu, habelə müxtəlif bəhanələrlə tələbələrdən yığdığı külli miqdarda vəsaitlər, şəxsi kabinetindən götürülmüş qeyd vərəqələri ilə bağlı ittihamlar var. O, Azərbaycandakı dələduzluq fəaliyyətini Fransada da həyata keçirməyə nail olub. İddialara görə, Elşad Abdullayev bir neçə il əvvəl ailəlikcə Rusiya vətəndaşlığını qəbul edib.
Elşad Abdullayevin həbs edilərək Azərbaycana ekstradisiya olunacağı barədə illərdir danışılır. Azərbaycanın sabiq baş prokuroru Zakir Qaralov da açıqlamalarının birində Elşad Abdullayevin ekstradisiyası ilə bağlı müvafiq qurumlara müraciət olunduğunu bildirib, “əminəm ki, o, Azərbaycana ekstradisiya olunacaq” demişdi.
“Bakı” Hüquq Şirkətinin rəhbəri Natiq Ələsgərov “Yeni Müsavat”a deyib ki, hər hansı bir şəxsin ekstradisiyası üçün ölkələr arasında saziş olmalıdır: “Ekstradisiya (cinayətkarın təhvil verilməsi) haqqında sazişin olub-olmaması prosesə birbaşa təsir edir. Azərbaycan və Fransa arasında birbaşa ekstradisiya sazişi olmadığı üçün bu cür hallar əsasən beynəlxalq öhdəliklər və ölkədaxili qanunlara uyğun şəkildə qiymətləndirilir. Ekstradisiya edilən şəxsin ittiham olunduğu əməl həm tələb edən, həm də ekstradisiyanı gerçəkləşdirəcək ölkədə cinayət sayılmalıdır. Əks halda, ekstradisiya imtina oluna bilir. Mümkündür ki, bu və ya digər şəxsə qarşı irəli sürülən ittihamlar bu prinsip baxımından problemli sayıla bilər”.
Natiq Ələsgərov deyib ki, Avropa dövlətləri siyasi motivli ekstradisiyalara mənfi yanaşır: “Əgər mühacir şəxsin ittihamları siyasi motivlidirsə, yəni o, siyasi baxışlarına, ifadə azadlığına görə təqib olunursa, ekstradisiyadan imtina edilir. Avropa dövlətləri ekstradisiyanın ediləcəyi ölkədə şəxsin ədalətli məhkəmə təminatı alacağına əmin olmadıqda təhvil verməkdən imtina edə bilər. Azərbaycanda məhkəmə sisteminə dair beynəlxalq tənqid və qiymətləndirmələr bu prosesi çətinləşdirir. Şəxsin siyasi sığınacaq üçün müraciət etməsi, müraciət qəbul olunarsa, ekstradisiya avtomatik olaraq qeyri-mümkün olur. Bundan başqa, şəxsin müvəqqəti yaşayış icazəsi ilə qalması da onun hüquqi statusunun qiymətləndirilmə prosesində olduğuna işarədir. Ola bilər ki, şəxsin ekstradisiyasının mümkünsüzlüyü insan haqlarına prioritet yanaşma və beynəlxalq ekstradisiya prosedurlarının tələbləri ilə əlaqəlidir. Bu amillər nəticəsində, hətta ağır ittihamlar olduğu halda da ekstradisiya mümkün olmaya bilir”.
