Aİ-nin baş diplomatı İrəvana gedər-getməz Bakı ilə əlaqələrə zərbə vurdu – sərt mövqe
Avropa Komissiyasının vitse-prezidenti, Aİ-nin Xarici siyasət və təhlükəsizlik məsələləri üzrə ali nümayəndəsi Kaya Kallas Avropa Mühafizəkarlar və İslahatçılar Qrupunun üzvü Emmanuel Fraqkosla görüşüb. “Bakı-Xəbər” xəbər yayıb ki, Fraqkosun təxribatçı suallarını cavablandırarkən Kallas Azərbaycanın daxili işlərinə qarışıb.
O, Bakıda mühakimə edilən erməni hərbi canilərlə bağlı “siyasi məhbus”, “erməni əsirlər” kimi ifadələr işlədib, “qanunun aliliyi”, “insan haqları”na istinad edib.
Kallas deyib ki, Bakıda olarkən Azərbaycan Prezidenti ilə təkbətək görüşdə guya bu sözlər onun diqqətinə çatdırılıb. Kallas Azərbaycan Prezidenti ilə nə vaxt təkbətək görüşdü ki, indi yalandan açıqlama verir? Onun Azərbaycan Prezidentlə ilə təkbətək görüşü olmayıb.
Yada salaq ki, aprelin 25-də K.Kallas Azərbaycanın xarici işlər naziri Ceyhun Bayramovla təkbətək və geniş tərkibdə görüşlər keçirib. Həmin görüşdən də verilən məlumatda qeyd olunur ki, burda Azərbaycan və Aİ arasında əməkdaşlıq gündəliyinin mövcud vəziyyəti, inkişaf perspektivləri, enerji təhlükəsizliyi, nəqliyyat, kommunikasiyalar, iqlim dəyişmələri ilə mübarizə daxil olmaqla müxtəlif sahələrdə əməkdaşlıq imkanları, habelə regional təhlükəsizlik məsələləri və Azərbaycan-Ermənistan normallaşma prosesi müzakirə olunub.
Kallas niyə İrəvana gedər-getməz Bakı-Brüssel əlaqələrinə zərər vurur?
Çingiz Qənizadə
Demokratiya və İnsan Hüquqları Komitəsinin sədri, hüquq müdafiəçisi Çingiz Qənizadə mövzu ilə bağlı “Yeni Müsavat”a açıqlamasında bildirib ki, Avropada Azərbaycanın haqq səsinə, onun beynəlxalq hüquqa əsaslanan haqlı mübarizəsinə obyektiv və ədalətli yanaşma sərgiləmək istəməyən müəyyən siyasi dairələr, nüfuzlu şəxslər və təsir gücünə malik qərarverici orqanlar mövcuddur: “Xüsusilə də Avropa Komissiyasının vitse-prezidenti, Avropa İttifaqının Xarici Siyasət və Təhlükəsizlik məsələləri üzrə ali nümayəndəsi Kaya Kallasın son açıqlamaları bu tendensiyanın bariz nümunəsidir və təəssüf ki, gözlənilməz deyil. Uzun illərdir ki, Avropanın bəzi siyasi institutları və fərdi fiqurları erməni lobbisinin təsiri altına düşüblər və bu lobbiçilik fəaliyyətləri onların obyektiv mövqe nümayiş etdirməsinə ciddi şəkildə mane olur. Belə bir şəraitdə Azərbaycanın haqq səsini eşitmək, real vəziyyəti düzgün qiymətləndirmək əvəzinə, reallığı təhrif edən, ikili standartlara əsaslanan, qərəzli və yönləndirilmiş bəyanatlar verilir”.
Ç.Qənizadə söyləyib ki, Azərbaycan xalqına qarşı törətdiyi hərbi və mülki cinayətlərə görə məsuliyyətə cəlb olunmuş şəxslərin məhkəməsi gedir: “Bu proseslər tam şəffaf, qanun çərçivəsində və beynəlxalq hüquq normalarına uyğun şəkildə aparılır. Lakin təəssüf ki, belə bir ədalət mühakiməsi zamanı belə şəxsləri ”siyasi məhbus” kimi təqdim etmək cəhdləri göstərilir. Bu, təkcə Azərbaycan dövlətinə qarşı deyil, eyni zamanda, beynəlxalq hüquqa və ümumən insanlığa qarşı yönəlmiş riyakarlıqdır.
Əslində, “siyasi məhbus” anlayışının özü Avropada çox vaxt ikili standartlara əsasən tətbiq olunur. Avropa İttifaqında bu anlayışın dəqiq, vahid, hüquqi çərçivədə formalaşmış bir tərifi yoxdur. Hər ölkəyə, hər hadisəyə, hətta hər şəxsə fərqli yanaşılır. Kaya Kallas da çox yaxşı bilir ki, bu gün “erməni əsirləri” kimi təqdim edilən şəxslər əslində hərbi cinayətkarlardır və onlar beynəlxalq hüquq normalarına əsasən mühakimə olunurlar. Bu şəxslər müharibənin başlanması, işğalçılıq siyasətinin həyata keçirilməsi, separatçılığın təşviqi, dinc əhaliyə qarşı terror aktlarının törədilməsi və digər ağır cinayətlərə görə məsuliyyət daşıyırlar”.
Hüquq müdafiəçisi hesab edir ki, belə bir fonda onların “siyasi məhbus” adlandırılması həm hüquqi, həm də mənəvi baxımdan qəbuledilməzdir: “Azərbaycanın məhkəmə sistemi bu məsələlərdə yüksək peşəkarlıq və obyektivlik nümayiş etdirir. Son dövrlərdə keçirilən məhkəmə proseslərində müşahidə olunan şəffaflıq, prosedur qaydalarına ciddi riayət edilməsi, təqsirləndirilən şəxslərin hüquqlarının tam təmin olunması – o cümlədən müstəqil vəkillərlə təmin olunmaları, vəsatətlərinə baxılması, ehtiyat hakimlərin təyin olunması və digər detallara ciddi yanaşılması göstərir ki, burada hansısa qanun pozuntusundan, qeyri-obyektivlikdən söhbət gedə bilməz. Bu proseslərə beynəlxalq müşahidəçilər və diplomatik nümayəndəliklərin əməkdaşları da qatılır və onlar da bu şəffaflığın, hüquqi əsasların şahidi olurlar”.
Həmsöhbətimizin fikrincə, ən maraqlısı isə budur ki, bu şəxslərin bir çoxu törətdikləri cinayətləri etiraf ediblər: “Onlar açıq şəkildə bildirirlər ki, dinc əhalinin yaşadığı evlərə gecə saatlarında raket və artilleriya zərbələri endiriblər, şəhərlərin işğalında və ərazilərin bölünməsində fəal iştirak ediblər. Bütün bunları öz dilləri ilə etiraf edən şəxsləri hələ də ”siyasi məhbus” kimi təqdim etmək cəhdi, sadəcə olaraq beynəlxalq ictimai rəyi çaşdırmaq və Ermənistanın maraqlarına xidmət etmək cəhdidir”.
Ç.Qənizadə qeyd edib ki, Kaya Kallasın Prezidentlə guya baş tutmuş görüşə istinad edərək irəli sürdüyü fikirlər də əslində Avropa ictimaiyyətinə və onun öz arxasında dayanan siyasi himayədarlarına yönəlmiş, faktlara deyil, manipulyasiyaya əsaslanan yalan və uydurma bəyanatlardır: “Onun sözlərində olan ziddiyyətlər və reallıqdan uzaq iddialar göstərir ki, bu kimi çıxışlar sırf siyasi sifariş əsasında hazırlanır və heç bir obyektivliyə malik deyil. Azərbaycan xalqının qanına əli bulaşmış, günahsız insanlara qarşı ağır cinayətlər törətmiş, yüzlərlə ailənin faciəsinə səbəb olmuş bu şəxslərin hər biri hansısa beynəlxalq səviyyədə verilən bəyanatlardan, qərarlardan asılı olmayaraq, Azərbaycan Respublikasının qanunları ilə mühakimə olunacaq və layiqli cəzalarını alacaqlar. Burada güzəştə, bağışlanmağa və siyasi don geyindirilməsinə yer yoxdur. Ədalət bərpa olunmalıdır və olunacaq!”
