Bu gün-mayın 10-u Ümummilli Lider Heydər Əliyevin anadan olmasının 102-ci ildönümü ölkəmizlə yanaşı, bütün türk dünyasında da qeyd edilir. Müasir müstəqil Azərbaycanın memarı və qurucusu, türk dünyasının böyük oğlu Heydər Əliyevin türkdilli respublikalar arasında dostluq əlaqələrinin qurulmasında əvəzsiz xidmətləri olub. Türk xalqlarının birliyinə xüsusi önəm verən Ulu Öndər milli ideallarımıza həmişə böyük hörmətlə yanaşıb. Qardas Türkiyə Cümhuriyyəti ilə münasibətlərin yeni müstəvidə qurulması üçün misilsiz xidmətlər göstərən “Biz bir millət, iki dövlətik” deyərək qardaşlığımızı bütün dünyaya bəyan edən Ümummilli Lider Özbəkistan, Qazaxıstan, Qırğızıstan, Türkmənistanla da əlaqələrin inkişafında böyük rol oynayıb.
Ulu Öndərin altı min ildən çox tarixi olan, 300 milyonluq türk dünyasının birliyinin, həmrəyliyinin inkişafı, möhkəmləndirilməsi istiqamətindəki xidmətləri tarixə qızıl hərflərlə yazılıb. Ümummilli Lider Azərbaycan-Türkiyə münasibətlərinin inkişafına həmişə xüsusi diqqət yetirib. Əsrlər boyu türk xalqlarının birliyinə nail olmaq üçün tarixi şəxsiyyətlərimiz dövrün siyasi şəraitinə uyğun mübarizə aparıblar. XX əsrin əvvəllərində bu tarixi missiyanı Qazi Mustafa Kamal Atatürk, ötən əsrin sonlarından başlayaraq isə Ulu Öndər Heydər Əliyev uğurla həyata keçiriblər. Ümummilli Lider Heydər Əliyev ötən əsrin 90-cı illərində böyük bir uzaqgörənliklə Azərbaycanın karbohidrogen ehtiyatlarının işlənməsi və Qərbə doğru nəqlini təmin etməklə ölkələrimizin iqtisadi qüdrətini artırıb, beynəlxalq enerji təhlükəsizliyi məsələsində qardaş Türkiyənin gücünü durmadan artıran yeni bir güc mərkəzi yaradıb. Məhz buna görə də qardaş ölkədə Ulu Öndərin adının əbədiləşdirilməsi dahi şəxsiyyətin tarixi missiyası qarşısında türk xalqının mənəvi borcudur.
Ulu Öndər Heydər Əliyevin düşünülmüş və cəsarətli qərarları, qətiyyətli addımları və təməlini qoyduğu uğurlu xarici siyasət nəticəsində bu gün Azərbaycan-Türkiyə münasibətləri bütün dünyada bənzəri olmayan dostluq, qardaşlıq və müttəfiqlik səviyyəsinə yüksəlib. Ulu Öndər 1997-ci il mayın 6-da Türkiyə Böyük Millət Məclisində çıxışında bildirmişdi ki, Türkiyə-Azərbaycan dostluğu əbədi və sarsılmazdır. Ümummilli Liderin 1999-cu il noyabrın 1-də Beynəlxalq Atatürk Sülh Mükafatına layiq görülməsi bir daha təsdiqlədi ki, Heydər Əliyevin türk dünyası qarşısındakı əvəzsiz xidmətləri qardaş, dost Türkiyədə yüksək qiymətləndirilir. Mükafatın təqdim edilməsi münasibətilə keçirilən təntənəli mərasimdə çıxış edən Ulu Öndər demişdir: “Mən bu gün böyük həyəcan içindəyəm, çünki Türkiyə dövlətinin qurucusu, böyük öndər Atatürkün adını daşıyan beynəlxalq sülh, barış mükafatına layiq görülmüşəm. Bu mükafatı mənə belə təntənəli şəraitdə-ən yüksək vəzifəli şəxslərin iştirakı ilə Türkiyə Cümhuriyyətinin başçısı, əziz dostum, qardaşım Süleyman Dəmirəl təqdim etdi. Mən həyatımda çox mükafatlar almışam. Ancaq Türkiyə Cümhuriyyətinin banisi, böyük öndər Mustafa Kamal Atatürkün adını daşıyan sülh mükafatını almaq mənim üçün böyük şərəfdir. Bu mükafat indiyə qədər aldığım mükafatların hamısından yüksək və qiymətlidir”.
Türk dünyasının birliyi naminə misilsiz xidmətlər göstərən, Azərbaycan-Türkiyə dostluğuna və qardaşlığına böyük töhfələr verən Ümummilli Liderimizin işıqlı xatirəsi qardaş ölkədə daim uca tutulur. Belə ki, 2012-ci ildə Ulu Öndərin vəfatının 9-cu ildönümü ilə əlaqədar Ankaranın Yeniməhəllə rayonunda Heydər Əliyev Parkının və Heydər Əliyev adına orta məktəbin açılış mərasimi olub.
Qürurverici haldır ki, “Əsrin müqaviləsi”nin tərkib hissəsi olan, XXI əsrin ən böyük enerji layihəsi adlandırılan, 2006-cı il iyulun 13-də Prezident İlham Əliyevin iştirakı ilə Türkiyənin Ceyhan şəhərində açılış mərasimi keçirilən Bakı-Tbilisi-Ceyhan əsas ixrac boru kəmərinə də qardaş Türkiyə Cümhuriyyəti tərəfindən Ulu Öndər Heydər Əliyevin adı verilib. Həmçinin 2018-ci ildə İzmir şəhərinin Karşıyaka rayonunda Ümummilli Lider Heydər Əliyevin adına salınmış parkın və abidənin açılışı, Türkiyə Cümhuriyyətinin qurucusu Mustafa Kamal Atatürkün ən çox sevdiyi və ömrünün çox hissəsini keçirdiyi bu şəhərdə dahi şəxsiyyət Heydər Əliyevin adının əbədiləşdirilməsi türk dünyasının hər iki şəxsiyyətinə verdiyi ən böyük dəyərdir.
Ulu Öndər Heydər Əliyev türk xalqlarının mədəni irsinin, ortaq dəyərlərinin yaşadılması, həmrəylik və qardaşlıq münasibətlərinin möhkəmləndirilməsi yönündə türk dünyası qarşısında layiqli xidmətlər göstərmişdir. Ümummilli Lider deyirdi: “Qədim dövrlərdə “Dədə Qorqud”, “Manas”, “Alpamış”, “Koroğlu” dastanları, xalqımızın hamısına mənsub olan dahi şairlərimiz, yazıçılarımız – Nizami, Yunis İmrə, Əlişir Nəvai, Füzuli, Nəsimi, Məxtumqulu, Abay və digərləri xalqımızın tarixini, mənəvi dəyərlərini əks etdirir, xalqımızı dünyaya tanıdan ölməz əsərlər yaratmışlar”. Ulu Öndər Heydər Əliyevin qırğız xalqının qədim folklor abidəsi olan “Manas” dastanının 1000 illiyi münasibətilə 28 avqust 1995-ci ildə Qırğızıstanda keçirilən tədbirlərdə iştirak edərkən ifadə etdiyi aşağıdakı sözlər bu dahi şəxsiyyətin ortaq türk dəyərlərinə nə qədər dərindən bələd olduğunu və həmin dəyərlərə hansı mövqedən yanaşdığını əyani surətdə göstərir. “Manas” qırğız xalqının müdrikliyinin rəmzidir. “Manas”… bütün dünya sivilizasiyasının, bəşəriyyətin dəyərli sərvətidir, türk dünyasının, türkdilli xalqların, İslam dünyasının böyük mənəvi sərvətidir. “Manas” eyni zamanda Azərbaycan xalqına məxsusdur, Azərbaycan xalqının da mənəvi-mədəni sərvətidir. “Manas” bizim hamımızın, xalqlarımızın hamısının ulu babasıdır”.
İkinci Qarabağ müharibəsində Azərbaycanın tarixi Zəfəri türk dünyasının birliyində yeni bir mərhələnin başlanğıcı oldu. Bu gün türk dünyasının birliyi ölkəmizin işğaldan azad edilmiş ərazilərində geniş miqyas alan bərpa-quruculuq işlərində də özünü parlaq şəkildə büruzə verir. Qazaxıstan Prezidentinin təşəbbüsü ilə işğaldan azad edilmiş Füzuli şəhərində qazax xalqının böyük oğlu Kurmanqazı adına Uşaq Yaradıcılıq Mərkəzinin, Özbəkistan Prezidentinin təşəbbüsü ilə məktəb tikintisinin həyata keçirilməsi böyük türk dünyasının sarsılmaz birliyinin bariz nümunəsididr.
Ulu Öndərin siyasi kursunun layiqli davamçısı Prezident İlham Əliyevin uzaqgörən, uğurlu xarici siyasəti bu gün qardaş türk dövlətləri arasında əməkdaşlığın yüksələn xətlə inkişafına böyük töhfələr verir. Cənab İlham Əliyev 2024-cü il 7 fevralda keçirilən prezident seçkilərində inamlı qələbəsindən sonra keçirilən andiçmə mərasimindəki nitqində bildirib: “Biz beynəlxalq təşkilatlarla bağlı bundan sonra da öz addımlarımızı atacağıq, ilk növbədə, Türk Dövlətləri Təşkilatı çərçivəsində səylərimizi davam etdirəcəyik. Bu, bizim üçün prioritetdir. Bu, bizim üçün əsas beynəlxalq təşkilatdır, çünki bu, bizim ailəmizdir. Bizim başqa ailəmiz yoxdur. Bizim ailəmiz türk dünyasıdır”.
Zahid Rza, “İki sahil”
