Kreml İrəvanı Bakı və Ankaraya qarşı qızışdırır; analitiklərdən yeni ssenariyə hazırlıq xəbərdarlığı…
Rusiya xarici işlər naziri Sergey Lavrovun Ermənistana mayın 20-21-də baş tutan səfəri ilə bağlı erməni hərbi ekspert Ayk Nahapetyan sensasion iddialarla çıxış edib. O, Lavrovun Ağrı dağının fonunda çəkilən fotosunun Rusiya XİN-in sosial şəbəkə hesabında paylaşılmasının təsadüf olmadığını bildirib.
“Zəngəzur Rusiya üçün xüsusi əhəmiyyət kəsb edir. Təsadüfi deyil ki, Sergey Lavrov mətbuat konfransı zamanı Qafanda Rusiya konsulluğunun açılması ilə bağlı işlərin davam etdirildiyini bir daha vurğuladı. Lavrovun səfərinin növbəti mühüm mesajı isə onun Ermənistana gələn kimi ilk olaraq Qələbə parkını ziyarət etməsi və Böyük Vətən müharibəsi qurbanlarının xatirəsini yad etməsi, Ağrı dağının fonunda fotosunun yayımlanmasıdır”, – o bildirib.
Nahapetyanın iddiasına görə, Türkiyə Qara dəniz, Suriya və Cənubi Qafqazda Rusiyanı sıxışdırır: “Lavrov İrəvana Rusiyanın Cənubi Qafqazda böyük müharibəyə hazırlaşdığını göstərməyə gəlmişdi, ona görə də Ermənistan hakimiyyətinin mövqeyini aydınlaşdırmaq vacibdir”.
Erməni hərbi ekspertin iddiaları nə dərəcədə əsaslıdır və Azərbaycan hansı ön hazırlıqları görməlidir? Rusiya bölgədə Türkiyə ilə toqquşa bilərmi? Bu onun nəyinə lazımdır?
Rövşən Məhərrəmov
Hərbi ekspert, polkovnik Rövşən Məhərrəmov “Yeni Müsavat”a bildirdi ki, Lavrovun İrəvana səfəri zamanı davranışları və bəyanatları təkcə Ermənistana deyil, Türkiyə və Azərbaycana da mesaj idi: “Lavrov Ağrı dağı fonunda şəkil çəkdirib paylaşmaqla Ermənistana və Türkiyəyə mesaj verdi ki, Ermənistan Ağrı dağa iddiasından əl çəkə bilməz. Rusiya Ermənistanda daha da möhkəmlənməyə çalışır. Hesab edir ki, bunu etməsə Ermənistan Türkiyə və Azərbaycanla əlaqələr quracaq, Rusiyadan asılılığı get-gedə azalacaq. Ona görə də Ermənistana Lavrovun səfəri həyata keçirildi. Rusiya Türkiyə ilə açıq qarşıdurmaya getməz. Lakin Ermənistana həm Türkiyə, həm də Azərbaycanla münasibətlər qurmaması üçün müxtəlif yollarla təsir etməyə çalışa bilər. Ermənistanın Rusiyanın gizli təhriki ilə Azərbaycana qarşı təxribatlar həyata keçirəcəyi ehtimalı get-gedə artır. Rusiya aranı qarışdıra bilər. Azərbaycan ayıq-sayıq olmalıdır. Hazır olmalıdır. Eyni zamanda Ermənistan bilməlidir ki, Azərbaycana qarşı təxribatlar, hücumlar olacağı halda Türkiyə ilə imzalanmış Şuşa Bəyannaməsi işə düşə bilər. Bunun qarşısını Rusiya da ala bilməz”.
Qabil Hüseynli
Professor Qabil Hüseynli isə bildirdi ki, Lavrov faktiki olaraq Ermənistana Ermənistanı qızışdırmaq, ermənilərdə revanşist əhvalı artırmaq üçün gəlmişdi: “Ermənilər istər iqtidar, istər müxalifət öz qanlarından olan Lavrovun mesajını alıblar. Lavrovun səfəri başa çatan andan Azərbaycana qarşı açıqlamalar və bəyanatlar sərtləşib. Hətta xarici işlər naziri Ararat Mirzoyan Azərbaycanı Qarabağda etnik təmizləmə həyata keçirməkdə ittiham etdi. Düzdür, əvvəllər də Mirzoyanın dilindən belə böhtanlar eşitmişik. Amma ən azından son aylarda nə onun, nə də digər erməni rəsmilərin ritorikasında bu cür iddialar, Azərbaycanı qıcıqlandıracaq, gərginlik yaradacaq fikirlərə rast gəlmirdik. Paşinyan hətta Albaniya paytaxtında Azərbaycan Prezidentini kofe içməyə dəvət etmişdi. Rusiya Ermənistanın Azərbaycanla kofe içmək qədər yaxınlaşmasına dözmədi”.
Q.Hüseynli dedi ki, Lavrov dərhal İrəvana gəldi və erməniləri qızışdırıb getdi: “Rusiya bu bölgədə daimi sülhün olmasını istəmədiyini bir daha açıq şəkildə ortaya qoydu. Lavrov verdiyi bəyanatlarla həm Qərbə, həm Türkiyəyə mesaj ötürdü ki, Paşinyanla müəyyən fikir ayrılıqları zaman-zaman olsa da Ermənistan Rusiyanın forpostu olaraq qalır, Moskva İrəvanı sərbəst buraxmaq fikrində deyil. Rusiya Cənubi Qafqazda, o cümlədən Ermənistanda Türkiyənin mövqelərinin güclənməsini heç zaman istəməyib, bunu öz maraqlarına təhlükə sayıb və bu gün də belə düşünür. Ona görə də bütün imkanları ilə Türkiyəni uzaqda tutmağa çalışır və çalışacaq. Ermənistana da imkan vermək istəmir ki, Türkiyə ilə əlaqələri qurulsun, Azərbaycanla sülh sazişi imzalasın. Azərbaycan Ermənistanın Rusiya təhriki ilə təxribatlara əl atacağı ssenariyə hazır olmalıdır”.
Etibar SEYİDAĞA,
“Yeni Müsavat”
